Salamo 37:3-27

³GUIAU mo au sunumaei, laulau lolodi mo au laulauedi, arinai emi oea eai abo au mia, ma nuatarumiu.

⁴U hekodeuioim GUIAU arinai, eo oa nuam ena henuhenua ia abo i leawa.

⁵Em dobila GUIAU nimana eai u tore; ia u sunumaei, abo hinage i paisoa.

⁶Em laulau dudurai abo i hemasaraha doha mara, eo am ao duduraina doha asuasubenalai.

⁷U heaiyawasiuioim GUIAU matana eai, eo u bagibagi ma nuapai’ipai’im; tabu nuam i mode paana esau ena dobila i lau lolo, ia laulau baaea wa i hetuhetubudi.

⁸Ouyalaya u helautom, eo nuaheura i otawa! Tabu hinage u nuamodemode, ata u hebaaea’uioim.

⁹Mata paana laulau baaea tataodi abo se tomgabaedi; na isi GUIAU ena nuatu se bagiwatai tanoubu abo se abi isi enadi.

¹⁰Huia ku’uku’u mo eo laulau gewagewa tauna abo i tauyamui, taba ena eanua eai se eo’oeo’oi, ia nei eai nige’e.

¹¹Na manabiga tataodi tanoubu abo se abi isi enadi, ainauia lailai hinage abo se hearo eo arinai abo se kode.

¹²Tau laulau gewagewa i nuatu nonohai bena tau laulau dudurai i heamamna, eo hinage ia arinai moana i taburueahisi;

¹³na Guiau tau baaea i marumaruhiei, paana ie ita ena huia i laolaoma.

¹⁴Tau laulau gewagewa elepa i niusihai, pidu hinage ie tu, bena gogogesagesa tauna i laudobei eo laulau dudurai tataodi bena i unuidi;

¹⁵edi elepa abo i soralau isi isibom nuadi eai, edi pidu abo se hetagodudi.

¹⁶Tau dudurai ena gogo begana mo, i lolo ariri abotai laulau gewagewa tataodi edi gogo lailai didigadi.

¹⁷Paana tau gewagewa nimana abo se godudi, na GUIAU taududurai abo i abiisini.

¹⁸Tatao nige abahegirudi GUIAU edi huia abina i atao, edi gogo hinage abo se ota i lau e nige nosina.

¹⁹Huia piripiri eai taba nige se hetaumaeamaeadi, guriam asubenana eai hinage adi aiai abo i lai ariri.

²⁰Na tatao baabaaeadi abo se tomgabaedi GUIAU ana waiunuyao isi doha oea liasina, se tauyamui— doha asuasu se tautauyamui ariri.

²¹Tau laulau gewagewa ginauri i sagesagenai, na taba nige i hemaisauioi, na tau laulau dudurai ena abi se lolo, to i aiainauia;

²²isi GUIAU i nualoloedi abo oea se abi enadi, na isi i ribahematedi abo se tomgabaedi.

²³Tau lolo ena abalau GUIAU i nuatu nonohai, eo tau wa i nualolo arinai, abo i hetoro komakomani;

²⁴taba ie beu, taba nige i lau ariri, paana GUIAU i abilau nimana eai.

²⁵Egu huia hewari eai i laoma e egu huia tautaubada, sora nige taududurai ea ita se nuagabaei, e nanatunayao falawa se aiaiboda.

²⁶Ia huia gamagari i aiainauiasom, eo ia arinai se sagesagena. eo nanatunayao hinage tatao se henualoloedi.

²⁷Baaea u torohaigabaei, lolo mo u abiwatai, arinai abo u miatahitahi i lau e nige nosina.