Salamo 22:21-31

²¹Liona awana eai u hemaurigu, bulumakau manamanabaradi donadi eai earuagu nuanuadubuna bena u saguhai!

²²Oa esam abo ea wasawasaei egu tataoyao aridi eai, tatao peledi boeadi eai abo ea aihelahuim:

²³Omi, eai to eai GUIAU au matausiei, ia au aihelahui! Omi, Iakobo nanatunayao ia au ribapasipasiei, ia matausina nuamiu eai, omi Isaraela nanatunayao!

²⁴Paana ia tau ai’iwala ana iwala nige i isuewaei eo nige i hewaiunuei; matana nige i toreamui arinai, na ena dou mo i ataiei.

²⁵Moutuana matadi eai abo ea hedebasaem; egu riba aigora abo ea heduduraidi isi taumatausiem matadi eai.

²⁶Tau gogogesagesa abo se aiai, eo abo bogadi se sese. Eai to eai ia se eo’oeo’oi abo GUIAU se hedebasaei! Bena se amna lolo i lau e nige nosina!

²⁷Tanoubu tupo gamagamagari abo se henuaisini eo abo se sinibui GUIAU arinai; eanua gamagaridi taumiaidi abo se tabaohu ia arinai.

²⁸Paana GUIAU ia wasawasa ede, eanua gamagaridi taumiaidi ia tanuagadi eai ie lau.

²⁹Mamohoi ariri ia matana eai tanoubu taunuasaesae gamagaridi abo se tabaohui; isi gamagaridi se hemala tanouio ia arinai abo se tabaohu, isi hinage nige abina se ata se hemauriuioidi.

³⁰Isimurita ia abo se heayaiyei; Guiau wasana tatao adi isimurita abo se heribadi,

³¹ena mauri abo se wasaduaiei isi sora nige se labasidi aridi eai, ia ana paisoa ede meta.