Salamo 22:10-26

¹⁰Egu huia labasi eai i laoma e wauta oa u itawataigu, sinagu bogana eai i laoma e huia ta oa egu Eaubada ede.

¹¹Tabu oa eda lohaloha eai, paana huia baaea i hanahanauma, eo nige doga esau bena i saguigu.

¹²Bulumakau tamoadi gamagaridi se torohetai’irigu; Basana edi bulumakau adiadidiridi se torohetai’irigu;

¹³awadi se dabari helaidi matagu eai doha liona guriguriamdi, eo se doulailai.

¹⁴Amnagu ede doha goila se hegoigabaei, eo siadagu popodi se tarumo. Nuagu doha wax nuapougu eai ie welo;

¹⁵adidirigu ie ohi, doha gulewa se oigoru, memenagu ie patu gaeagaeagu eai; mate mua’a mua’ana eai u he’enogu.

¹⁶Mamohoi kedewa se torohetai’ irigu, tatao manamanabaradi se torohetai’ irigu; nimagu eo aegu se aigoridi—

¹⁷siadagu gamagaridi se hasiridi— tatao wa se aiai’ewaigu eo nuadi se lolo;

¹⁸agu lulu se soiedi, eo agu lulu gamagaridi hinage se hekelerodi.

¹⁹Na oa, GUIAU e, tabu u mia eda lohaloha eai, oa agu sagu ede, u heurama u saguigu!

²⁰Earuagu bena u saguhai elepa eai, kedewa edi gigibori eai hinage u abihemaurigu!

²¹Liona awana eai u hemaurigu, bulumakau manamanabaradi donadi eai earuagu nuanuadubuna bena u saguhai!

²²Oa esam abo ea wasawasaei egu tataoyao aridi eai, tatao peledi boeadi eai abo ea aihelahuim:

²³Omi, eai to eai GUIAU au matausiei, ia au aihelahui! Omi, Iakobo nanatunayao ia au ribapasipasiei, ia matausina nuamiu eai, omi Isaraela nanatunayao!

²⁴Paana ia tau ai’iwala ana iwala nige i isuewaei eo nige i hewaiunuei; matana nige i toreamui arinai, na ena dou mo i ataiei.

²⁵Moutuana matadi eai abo ea hedebasaem; egu riba aigora abo ea heduduraidi isi taumatausiem matadi eai.

²⁶Tau gogogesagesa abo se aiai, eo abo bogadi se sese. Eai to eai ia se eo’oeo’oi abo GUIAU se hedebasaei! Bena se amna lolo i lau e nige nosina!