10 Avontafepi krentenena, Magora fatgo vahera omanine. Magore huno omnitfa hu'ne.
11 Magore huno amanahu antahizane vahera omanine. Mago'mo'e huno anumzamofonkura nohakre.
12 Miko vahe'mo'za zamagena hunemi'za, ana miko'mo'za haviza nehaze. Magore huno knare'za nehia vahera omanine. Magore huno omanitfa hu'ne. (Sam-Zga 14:1-3)
13 Zamagerumo'a neginagi huno mati kerigamo hagaro huriankna nehie. Zamagefunafina havigemo avite'ne. Ha' osifavemofo avuatga zama'amo zamagitera me'ne. (Sam-Zga 5:9)
14 Zamagitera vahema sifinama huntezane, aka kegagamo avite'ne. (Sam-Zga 10:7)
15 Vahe'ma zamahe fri zantera ame'ama nehaze.
16 Inantego vazana vahe'ma zamazeri haviza hu'zane vahe'mofoma knama amizamo nezmavararie.
17 Inankna hu'za zamarimpa frua erigahaze zamagra ontahinaze. (Ais 59:7-8)
18 Anumzamofonku koro hu'zana nomane. (Sam-Zga 36:1)
19 Tagra antahi'none kasegama krente'nea kemo'a kasegema eri'naza vahe nezmasamie. Ana hanigeno mago'mo'a huno nagra ftago vahe mni'noe huno osugahie. I'o miko mopafi vahe'mota Anumzamofo avurera hazenketi me'nea vahe mni'none.
20 Na'ankure kasegemo'ma hu'neazama avarari zampintira, Anumzamofo avufina mago vahe'mo'a fatgo vahe mani'noe huno osugahie. Na'ankure kasegemo, kumimofo keno antahino huzana erifore nehie.
21 Hu'neanagi menina Anumzamofo fatgozana, kasege amage'ante zantetirompage, kasefa ka taveri hu'ne. Korapama Mosese'ma krente'nea avompima huvempa nehigeno, kasnampa vahe'mo'za hu'naza kante efore nehie.
22 Tagrama fatgo huta Anumzamofonte manisune hanuta, Jisas Kraisinte tamentintia hanunkeno, Anumzamo'a ftago vahe mni'naze huno hurantegahie. Mago kana omnetfa hu'ne. I'o.
23 Na'ankure maka'mota kumi huta Anumzamofo hanave'ane kumapina umanigara osuta, atupa hu'nonane.
24 Anumzamo'a knare erizama asuragiranteno Kraisimpi eri'nea zanteti, tamagra fatgo vahe mani'naze hu'ne. Agra e'i anazana Kraisimpi miza seranteno katufegeta, kumipintira fru huta mani'none.
25 Anumzamo'a, Jisasina tamigeno kumitimofo nona huno korama'a tagino, kumitia apaserante'nea zamo'a Anumzamo'a agru huno ftago huneankita, Agritema tamentinti hanuta Anumzamofontera egahune. Anumzamo'ma e'inahu hu'neazamo, Anumzamo'a fatgo hu'ne nehie. Ko'ma kumi hu'naza vahe'ma akoheno mni'neno kumizmia atrezmante'nea zamo'a eama hu'ne. E'ina zamo'enena eriama huno Jisasimpima zamentintima haza vahe'ma nezmavrea zamo'a taveri huno Anumzamo'a fatgo hu'ne nehie.
26 Na'ankure e'i anazama hiazanteti, Agra'a fatgozana meni knafina eriama hu'ne. Hanigeno kumi vahe'mo'za fatgo vahe mni'naze haniana, e'i Jisasi Kraisimpima zmentinti hanaza vaheku Anumzamo'a fatgo vahere huno huzmantegahie.
