1Amunu o lailad, da Kayaknu oo gai iiṯa doyak kobol dab mein, ag ag beḏulag, ahilag dab mak, ag oolag amu ag beḏulag laa oh ele aon, danab ag doḏ main Kayak medaṯeb amubia, ag ag beḏulag, ahilag dab mak, ag oolag amu ag beḏulag laa oh ele, nuhig uḏat heḵunu Kayak meṯaglagnu unuqadṯem. Ag beḏulag, ahilag dab mak, ag oolag amu ag beḏulag laa oh ele op̱ia awak, Kayak oo niiṯe bia ele Nug meṯeg! Kayak Nug ahilagnu keeke oḵainab ha malom amunu ag beḏulag, ahilag dab mak, ag oolag amu ag beḏulag laa oh ele ag eḏun, Nug meṯaglagnu am keeke oḵaite? Iiṯa.
2Danab laa ag wan imup̱an kobolnuib guaṯak oiṯeb amubia aib oip̱ig. Iiṯa! Kayak Nug heeb, ahilag dab mak ena bau beeb, ag oiyak baup̱a oiyeg! Ag anam hena amu ag Kayak, Nug ag aḏi heḵulagnu dab meṯe amu ag dooglag. Ag amu doona amu ag Kayak Nug aḏi haknu ena dooṯe, aḏi haknu enanag dooṯe, aḏi haknu elelenab dooṯe amu ag amu ele dooglag.
3Kayak Nug da ehaniṯak oḵai hamu meḏom amu da amup̱a ag anen anen amelagp̱a aṯem. Ag aḵa anen anen ahilagnu amu laa oh eḏaṯak, ag enanag daaṯeb aib doop̱ig. Iiṯa, Kayak Nug oop̱a genab doyak ahilag ag anen anen maṯe, ag uḏat heṯeb ele amu, ag amu dab menan, ag aḵa anen anen ag ahilagnu dab mak tutuḵu aon oiyeg!
4Ig danab ig oh anen anen amu ig beḏunig piḏe piḏe. Aria ig beḏunig piḏe piḏe amu ag am laih kuḏum amu laih kuḏum amu ag ahilag uḏat ele laip̱u iiṯa daaṯeb.
5Amubia ig oh Kristus ele tamanidta laip̱u daaṯem, ig danab nug beḏu laih kuḏum amge beḏu amu laip̱u daaṯe, amubia ig am kuḏum amge laip̱u daaṯem. Beḏu laip̱u oop̱anu laih naunau ag nug ehanidnana daaṯeb, amubia Kristen tamaniak nug ele anam daaṯe.
6Kayak Nug ig anen anen uḏat laala heḵunignu ehah meḵom amunu danab laa nug nai mehuqṯe amu nug oop̱a genab doyak nuhig dim lamiṯa, nai mehuqaḏ!
7Aria danab laa nug laiḵud laa ehanadṯe amu nug laiḵud laa ehanaṯak uḏat genab haḏ! Danab laa nug laiḵud keeke ip̱uanadṯe amu nug ip̱uanaṯak uḏat tutuḵu haḏ!
8Danab nug laiḵud, dab mak ahilag maḏ adaṯe amu nug dab mak maḏ eṯak uḏat tutuḵu haḏ! Amu danab laa nug layag keeke medaṯe amu nug keeke hap̱iak meṯaḏ! Danab laa nug gumak uḏat heṯe amu nug uḏat amu gumaḵunu oo ahak enap̱a gumaḏ! Danab laa nug layagnu oo gai iiṯa doya ehanidṯe amu nug oo gamag ahak oḵai enap̱a ehaniṯaḏ!
9Ag lailḵad dilag genab huana oolag mauhaḏ! Ag aib ham bup̱uak bia hep̱ig. Ag kobol nau oh di maṯana amu ag kobol ena amuib aḏan autna aweg!
10Amu ag lailḵad oolag maṯan, ahilagnu oolag mauhaḏ! Ag oh nug binag meṯak elelenab heig!
11Amu ag aib bahilag yom. Ag hanhan uḏat g̱agaṯag heig! Ag anam hebep̱eg amu Kayak Ouḏi ag maḏ aṯebeb, Naḏinu uḏat heḵulagnu oolag meṯeg!
12Amu ag Naḏi ehanadḵunu ameg meṯeb ele amu, ag amunu dab menan daanna, ag oolag gamag ahaḏ! Ug laa ahilagp̱a uḏieb amu ag g̱agaṯag dayeg! Amu ag hanhan unuqiṯeg!
13Kayaknu danab laa ag keekenu tutu daap̱eg amu ag ehanaṯeg! Danab laihnu, ag ii doyadṯeb ele amu, ag uḏip̱eg, ag diin atog noadḵulagnu dab menan heig!
14Danab laa ag ahilagp̱a eheḏ hep̱eg amu ag Kayak Nug danab amu ehanaṯa, kobol ena ahilagp̱a heḵunu unuqiṯeg! Ag aib Nug nob nau madaḵunu unuqidp̱ig.
15Danab ag oolag gamag aheb, ag ele oh oolag gamag ahaḏ! Danab gaap̱eg, ag ele oh gayeg!
16Amu ag aḵa ahilagnu dab meṯeb amubia amu ag lailḵad dilag dab mena anam heig! Ag aḵa ag am binalag ele amu, ag anam aib dab mep̱ig. Iiṯa. Amu ag danab binag oḵai iiṯa ele oh oiyeg! Ag aḵa ahilagib dab mena, “Da daḵa iiḵu doyak ena ele,” aib ap̱ig.
17Amu laa ag ahilagp̱a eheḏ laa hep̱eg, ag aib nob mena, amu dilagp̱a eheḏ hep̱ig. Ag danab oh amelagp̱a kobol enap̱a oiglagnu dab mak aweg!
18Maḏoḏ dayaknu amu ag aḏi aḏi hena, maḏoḏ ba daaḵunu daaṯe amu ag amu henana, laa dilag ele maḏoḏ daaglagnu ib daaṯe ele amu ib amu dim lamiṯeg!
19O lailadnab, laa ag ahilagp̱a eheḏ hep̱eg amu ag nob aib mep̱ig. Uup̱eg, Kayak nuḵa heeb, ag hip̱uninnu bu aqak, Kayak ep̱egp̱anu uḏiṯe amu, ag amu aoglag. Amuam Kayak naip̱a, nai daaṯe amubia. “Nob eḏua maknu amu dahil uḏat. Da daḵa geha nob nau madaḵul.” Naḏi Nug anam aṯe.
20Amge Kayak Nug uḏat amu heḵunu Kayak naip̱a, nai daaṯe ag amubia heḵulag. Nai amuam inam. “Kekeḏ nahip enug qeeb amu na e meṯe! Amu baag qaḏa eṯeb, lenu heeb, na le meṯe! Na anam hep̱e amu geha nug kobol nau nuhig amunu uḏa neḵu,” awa aṯe.
21Aria na aib hep̱e, kobol eheḏ na toniṯom. Na kobol tutuḵu henana amu na kobol nau qep̱e naḏ!
