Romeni 6

1

2

3

4

5

6

7

8

9

10

11

12

13

14

15

16

¹Ro ja izege vierafe? Ja vierafe no uria faememarena ise renoekuva Godi fu maza boeje no marejuokinu ise nuvuone guona arekiro ja ijiege vierafe?

²Ro ije fuka ma baki. Ro vame isuiko nuvuone no isuibe renoeva ije bune e ije bu oeva ijiege bune oe. Ijadufuo iviama no irerefuo una ise binobino renoeve?

³Ro jane vierafe do ije no Jesudo ive ijia rueva ijia none una Jesuna besu rei. Ijadufuo Jesu fu baronema ije nodua none fuina besu oe.

⁴Ro do ije no rueva ijia no vame nuvuone isuiko no oetuana kenoejo ije bune Jesuna besu oevo bu kena fuina mako ruiva ijieki. Rove fune izege Godi fu daro ro sanaema fuone ijia Jesu Kuraesi kuamo fu una urima ijia fu kuke daro besu ijia no kaenamue. Fu no kaenamuona una vame fuone maeje iviaeko no ma karivako ijia unue.

⁵Ro no Jesu fu baronema ijiege nodua no oevabitie no fu una urima ijiege nodua no una urike.

⁶Ro none ma vierafega vame nuvuone isuiko no kari ruaeva ije bune Jesuna kurosi ijia oe. Ijadufuo vame nuvuone isuiko ijadufuo daro ije fune Jesure mukoreigia abe tuasemo fune bazuarena bakirei. Ijadufuo iviama ise ijadufuo daro ije fu una no samuaguokuma baki. Ijadufuo maeje e baronema ije fu izege una urina ise renoekuma baki.

⁸Ro vame isuiko nuvuone no kari ruaeva ije bune Jesu Kuraesina besu oeva ijadufuo no ma vierafega maza rade no fuina ma karivake.

⁹Ijadufuo maeje none vierafega Jesu Kuraesi fu baronemoga Godire kuamo fu una urido fube una baroneke. Ijadufuo oevo ijadufuo daro ije fu izege una Jesu samuakuma baki.

¹⁰Ro Jesu fu baronema ije fume kaginu ise nuvuone ijadufuo baronedo fube una kuke baroneke. Ro iviama fune una urina Godiki fikinu ive fuone sanaema dabe aroeme.

¹¹Ijadufuo noka maza boeje vierafero ise ijadufuo daro ije fu izege una no samuaguokuma baki no ijiege vierafedufuo. Ijadufuo iviama no vierafega none Jesuna besu rei. Ijadufuo no vame izege fu rema ije nodua noka ijiege rekinu una vame Godi fu oemaredufuo ijia karinoeke.

¹²Iviama noeje none una Jesu Kuraesina agane besu rei. Ijadufuo noka giriesana vajae nuvuone konuvuo samuadufuo. Ro nobe mamoeke ise ije bu oe nuvuone ijia naona maza boeje no kaenamuona una vame ise ijia vake.

¹³Ro kuke nobe mamoega vajae nuvuone gue bu ise renoedufuo. Ude noeje noneka ise rena oekuvejoga Godire no kaenamuona una vame fuone maeje ijia unue. Ijadufuo vajae jone kena Godi vajaga fure kena fuone fu vierafema ijia i fuone maeje mefo.

¹⁴Ro jade uri mamoena Setanido itire ijiaru fiena ise renoekiro nika giriesana kojo vajae jone samuanamifo. Ijadufuo maeje ja Godido akae ijia bijua kariva baki ro jaka fuone izege fu e marejiamo ijia bijuana kari. Ijadufuo jade vierafero ja una ise rekinu karivakiro jade ijiege vierafevo.

¹⁶Ro ja e ije erare kiako ja maza boeje fuefuo imenoevo ije fuje fu e ireobo jone. Ijadufuo vame besu ijiege eranebe ja vierafe ja Setani irinake fure ja samuagiakuva ije jaka iserekinu oeke. Ro eranebe ja vierafe ja Godi irinake fure ja samuagiakuma ja ma karivako ijia abeke.

¹⁷Ja ude jane Setani irinana i fuone ise ije menoe. Rove iviama jane oe jone boejiakuma Godido vua maeje fiena una e ije bu Jesu Kuraesido vua nijasiaeva ije iriniae. Ja ijiege revo ijadufuo naka ireobo Godido oemareve.

¹⁸Iviama fune Godire ise ije ja renoevo ijia karauniamoga jane una vame fuone ma ijia ruae. Ijadufuo iviama ja Setanido i mejo baki ro ja Godido i maeje menoeve.

¹⁹Ro vua ige na ja e mamekanu ijiebuo i medufuo na ijia bijana kuariave. Na vua ijiege bijana kuariaekina ja fiena vierafekiro na ije kuariave. Isuibe ja Jesu Kuraesi naebe ma vierafeva ije jaka naebe vajae jone kojo samuagiae. Ro jaka kena una vame ise binobino uruvana ije renoe. Ijadufuo iviama ni vajae jone foteke kena una Godi vajaga fu ja kena una vame fuone maeje ijia uniaga ja i fuone akae ije menoefo.

²⁰Ude ja Setanido vame ije abena jaka i fuone ise binobino menoe. Ijadufuo ja Godido vame maeje fu oemaedufuo ije ja naebe renoekuae vierafei.

²¹Ro ja vierafe vame ise ja ude kenoeva ije maeje fu irere joefuo rei? Ire maeje fuka baki rove kavene jone bume isejavaema oe. Ijadufuo iviama ja una vame ise ije ja kenoeva ije giavone fuka mukoreigia jaediame.

²²Iviama fune Godire ja karauniae ro fure oe jone samuagiamo ijadufuo jane ise jone ja renoejo ije arena una i fuone menoeve. Jane una e akae fuone reva ijadufuo Godi fune vame ma karivako ije abe miame.

²³Ro erarebe bu ise renoekuva buka vame baromena vako ijia vake ro bube Godina karivake. Ro no Jesu Kuraesi E Ireobo nuvuone ma vierafekuva Godi fu duvado fuone ijia vame ma karivako ije vekinu abe muoke.