6 Kjá náhí. A̱ ntá tí jehya ijnko nkexro jína tí jehe chꞌán, ¿ntá nkexrí chrókjuinchekito̱exín chꞌán iji̱é chojni chjasintajni?
7 A̱ ntá tí chrókjuínki̱tsa tí kjuachꞌia kuènta̱na kíxin chrókónoaxínrá tí nkehe chaxín kuènte Dios, ¿a̱ ntá nkekuènté tsꞌékaráni jie̱ kíxin janhan mé ijnko chojni chónta jie̱?
8 Tí xi̱kaha la, ¿á chrókjuichꞌeni tí nkehe jínahya kíxin ntá chrókui tí nkehe jína? Mé xi̱kaha ichro iso chojni tꞌekani jie̱ kíxin xi̱kaha tjakoni, ichro sín. Tí sín a chrókjuasóte sín kíxin xi̱kaha ichro sín.
9 ¿Ntá nkexrí? Jeheni judíoni la, ¿á a̱ntsí má tjetoanni, a̱ ntá tí sín í so la, á náhí? Kjá náhí. Kíxin kaín ni chojni judíoni la ko tí sín jehya judío mé kaín ni kjuínchexiteyéhe̱ni tí jie̱ kjuasinni.
10 Ntáchro tí xroon itén Dios kíxin: Kohya ninkexró chrókjuichꞌe tí nkehe jína, la kohya nijnko chojni.
11 Kohya ninkexró tienxín, Kohya ninkexró chrókjueyá Dios.
12 Kaín chojni kꞌuékꞌaji sín tí nti̱a jínahya la ko kaín chojni jnkokón kꞌuáji sín ntoáhya, kohya ninkexró chrókjuichꞌe tí nkehe jína la kohya nijnko chojni.
13 Tí isin chojni la éxí tòye̱ tsíxrankehe tsíxravá chojni kíxin tí nejen chojni chꞌiyaxín. La tí veneno kuènte konche chónta irꞌva chojni.
14 Tí irꞌva chojni tsíkaón nkehe jínahya la ko kjuanínkaon.
15 Xritinká sín kíxin tjinkaon sín chrókꞌóyán sín chojni.
16 Tí nti̱a kꞌuáji sín tió xi̱kaha kjuíchꞌe sín mé kjuínchekꞌitjáyan sín kaín kjuaxróxin kꞌuéchónta ókjé chojni.
17 Chónhya sín tí nti̱a tjanjon kjuaxróxin
18 kíxin kjuenka̱yáxinhya sín chróchrako̱nhe̱n sín Dios. Mé xi̱kaha ntáchro itén Dios.
19 Ó noheni kíxin kaín tí nkehe nixja tí xroon chónta tí ley mé kꞌue̱tue̱nhen kaín tí sín tinkáchónki tí ley kíxin ntá kaín chojni chjasintajni chrótání sín kíxin kaín chojni tsjasóte kíxin Dios mé sinchekito̱exín iji̱é kaín chojni.
20 Kíxin ninkexró chrókjuacha chrókótjuáxin iji̱é sín kíxin chrókjuinchexiteyéhe̱ sín tí nkehe tꞌe̱to̱an tí ley. Tí ley la jehó chꞌe xra̱ tso̱noexínni kíxin chóntani jie̱.
