1L̇l̇ëbo shäryëy ber pjl̈o bek Sbö bokso l̈i miydëy pjl̈ú wl̈eni ga woyde ga shji iirkë bi pjeyoga ommiydoydë l̇l̇ëm obi l̈i kong l̇l̇ëme. L̇l̇ëbo ber bi kong pjl̈ú l̈i wl̈ẽydë l̇l̇ëm,
2l̇l̇ëbo ber pjl̈ú bi pjeyoga kong l̈i wl̈ẽydë dey, opping mär Sbö go jek këgong wl̈o.
3Cristo ëmdë ga l̇l̇ëbo shäryono ber pjl̈ú ba kong wl̈o l̇l̇ëm, tak pjang Sbö tjl̈õkwo go sorë l̈i eni. Tjl̈ẽ ga «Pja l̈ãywaraba owashko ga tja l̈ãywaraba wl̈eni.»
4L̇l̇ëbo uunkong tak pjang Sbö tjl̈õkwo go dënashko l̈i beno bi poshdunggl̈o, shji opping ber l̈öng e go wl̈o, shji dbokjrë e go wl̈o. Eni ga l̇l̇ëbo wen bi kong owashko ga kuy kjang ga pjl̈ú, l̇l̇ëbo tak pjang l̈i koshëy l̈öng wopjl̈ú kjĩshko.
5Shji kjimte Sbörë dbokjrë jek këgong, l̇l̇ëbo wen bi kong owa l̈i kuy kjang wl̈o. Rokër ba kong ga pjãy mär l̈öng Cristo Jesús go wopro ga pjãy kjimte wotjl̈ĩk kjrinaso,
6pjãy uunkong Sbö poshrëk no kjl̈araso wl̈eni wl̈o. Bi Tjl̈apga Jesucristo Data l̈i e.
7Pjãy wl̈okjrara Cristorë sorë ga pjãy ëng wl̈okjros kar kar eni bako, Sbö poshrëkoba wl̈o.
8Cristo öör judíoga kjimtë, ba parkaga tjwl̈ẽk shäng pjir wl̈eniyo dik, tjl̈õkwo bek l̈ara Sbörë ba tjl̈apgaga tek dënashko so tjwl̈õ ara kong jl̈õkoyo l̈i ber jl̈õkoyo wl̈o.
9Ga nopga judío l̇l̇ëm wl̈eniyo songe l̈ara bako, Sbö ie l̈ok ber kësbang, tjwl̈õ ara wl̈o, tak pjang Sbö tjl̈õkwo go sorë l̈i eni. Tjl̈ẽ ga «Pja poshrër tjëyoga obl̈ë obl̈ë bokshto, tja të bop kong bakoe.»
10Sbö tjl̈õkwo tak pjang eni obi: «Sbö nopga l̈öng wopjl̈ú, nopga judío l̇l̇ëm wl̈eniyo, pjãy ber l̈öng wopjl̈ú bakoe.»
11Sbö tjl̈õkwo tak pjang eni obi: «Nopga judío l̇l̇ëm wl̈eniyo, Tjl̈apga poshrëzĩa. Tjëyoga obl̈ë obl̈ë, pjãy të ba kong, ba poshrëkkl̈o.»
12Ga Isaías tjl̈ẽno beno eni: «Isaí tjëyo wen kjl̈ara, ber tjëyoga obl̈ë obl̈ë ichaga. Nopga judío l̇l̇ëm wl̈eniyo mär ba go.»
13Shji kjimte Sbörë l̇l̇ëye l̈ara l̈i koshë l̈öng wopjl̈úe. Rokër ba kong ga pjãy mär ba go kuzong ga pjãy kjimte ber wopjl̈ú, wl̈ẽpe. Rokër ba kong obi ga pjãy kjimte ba Sëyarë, l̇l̇ëye l̈ara l̈i koshë l̈öng wopjl̈ú anmoyõ wl̈o.
14Pjeyoga, miydër pjl̈ú ga l̇l̇ëbo shäryëy ber pjl̈o bek Sbö bokso l̈i miydëmi pjl̈ú, shäryëmi pjl̈ú, ga pjãy ëng ping e go ga pjl̈ú bakoe.
15Gueniyo kjibokwo ëre go, l̇l̇ëbo toror bomi kong obl̈ë obl̈ë kjang, woyojemi l̇l̇ëm wl̈o. Sbö wopjl̈ú l̈i kjĩshko ga tja iara beno Cristo Jesús parkaga nopga judío l̇l̇ëm wl̈eniyo kong, Sbö tjl̈õkwo roy pjl̈ú l̈ër ba kong wl̈o, epga twër ber Sbö kong, öng zröraba, sho suraba, pjono dret Sbö poshrëkkl̈o wl̈eni wl̈o, epga ie ba Sëyarë ber tjeng dboy ba kong wl̈o bakoe. Kjibokwo ëre toror bomi kong kjang e kjĩshko.
17E kjĩshko ga tja shäng wopjl̈ú Cristo Jesús tjok, pak shäryoror Sbö kong l̈i beno pjl̈ú kjĩshko.
18L̇l̇ëbo obl̈ë l̈anyotkër l̇l̇ëme. L̇l̇ëbo shäryara Cristorë bor go l̈i l̈anyotkotë eröe. Tja ichara ba tjl̈õkwo roy l̈ë nopga judío l̇l̇ëm wl̈eniyo kong. Ga tja kjimtara ba Sëyarë l̇l̇ëbo ĩydëba l̇l̇ëm wl̈eniyo shäryë ba kong obl̈ë obl̈ë ara. Eni ga Cristo roy pjl̈ú l̈oror ba kong Jerusalén kjokyo dwayo äär jong Iliria kjokyo, ga tjl̈õkwo l̈i kjrara nopgarë ara, beno l̈öng Sbö kol̈ë shara.
20Tek dënashko ga tjl̈õkwo roy pjl̈ú l̈i l̈ër woydë kjok shto obl̈ë obl̈ë, nopga omkuydë l̇l̇ëm obi l̈öng l̈ishko. Obl̈ë öör oml̈ë tjänshko ga tja äär woydë oml̈ë jek obi eshko l̇l̇ëme.
21Shäryër woydë, tak pjang Sbö tjl̈õkwo go sorë l̈i eni. Tjl̈ẽ ga «Ba roy äär, äätë kjone l̇l̇ëm obi l̈ishko. Ëye ba roy kuydë l̇l̇ëm obi ga kuya.»
22Tja jek bomi ĩk l̈oror ara, gueniyo tja jekdë l̇l̇ëm obi e kjĩshko.
23Tja jek bomi ĩk woyotjl̈ĩn sök l̈u kop ara tjän. Eerishko ga bor pak pjitong kjok ëreshko.
24Eni ga tja jek shäng España kjokyoshko ga pjãy ĩn äär woydë, tja ber sök bomi tjok dbar kjwöbö wl̈o, pjir ga tja kjimtëmi jek äär eshko wl̈o.
25Gueniyo tja to Jerusalén kjokyo bäm go. Sbö tjl̈õkwo kjragaga l̈öng Macedonia kjokyo, Acaya kjokyo, e dbur töno, iche Sbö nopga song wl̈eniyo l̈öng Jerusalén kjokyo l̈i kong wl̈o, ga jek sör ba kong.
27Shäryara l̈ok eni ba woshko, miyde l̈ok ga pogo tjwl̈õ ba kong ara. Judíoga Sbö tjl̈õkwo roy shdöno nopga judío l̇l̇ëm wl̈eniyo kong. E kjĩshko ga bek ga kar l̇l̇ëbo twe ba kong, ba kjimtokl̈o.
28Eni ga dbur l̈i ioror beno tjeng ba wl̈oshko pjir ga tja jongya España kjokyo shara. Tja jek shäng eshkoshko ga pjãy ĩn äär.
29Miydër pjl̈ú ga tja äär bomi shwoyshko ga shji kjimte Cristorë ara eshko.
30Pjeyoga, shji mär bi Tjl̈apga Jesucristo go, ga shji ie ba Sëyarë ëng woydë ara kar kar. Eni ga tja drön bor pak shäryë wopro ga rokër bomi kong ga pjãy syõshtë Sbö kong bor kjĩshko jl̈õkoyo. Enira tja kjimtëmi ba shäryë.
31Rokozĩ ba kong ga tja döya Cristo tjl̈õkwo kjragaga l̇l̇ëm l̈öng Jerusalén kjokyo l̈i wl̈oshko dwayo. Rokozĩ ba kong obi ga bi pjeyoga l̈öng Jerusalén kjokyo l̈i, l̇l̇ëbo söror ba kong l̈i wl̈okjre l̈ok wopjl̈úe.
32Woyde Sbörë eni wl̈eni ga tja äär bomi ĩk wopjl̈ú, tja woshtë bomi shwoy ga pjl̈ú wl̈o.
33Rokër Sbö kong ga pjãy ie ber l̈öng wl̈ẽpe. Ber eni.
