7 No benne' Dios bneẕjwe' chie' gone' x̱chine', cháwe'do' žaḻa' gonen'. No benne' Dios bneẕjwe' chie' wsedle' benách ka', cháwe'do' žaḻa' wsedle' ḻégake'.
8 No benne' Dios bneẕjwe' chie' wzejni'ile' benách ka', na' cháwe'do' žaḻa' wzejni'ile' ḻégake'. No benne' bi da' wneẕjwe' che no benne' yoble, dot ḻaže'e žaḻa' wneẕjwen'. No benne' ẕnna bi'e benách ka', ḻo yeḻa' gax̱jw ḻaže' žaḻa' gonen'. No benne' žákḻene' lježe' ka', ḻen yeḻa' žebél žaḻa' gonen'.
9 Žaḻa' ží'ilele lježle ka' dot ḻáže'le. Le wzóa da' kegle cheḻa'ale. Le we' ḻaže' gonle da' naken chawe'.
10 Le ži'il lježle ka' kan nži'il kwinkzle. Kan žaple ba la'ne lježle žaḻa' gonle ga gakže' benne' blo.
11 Le gon chóchteze ḻáže'le, na' bi wedle. Le gon x̱chin X̱anžon' dot ḻáže'le.
12 Le yebél dan' zoa da' žx̱en ḻáže'le. Le kwez ẕen ḻaže' kate' bi ẕzáka'le. Le wcháḻjḻenteze Dios.
13 Le wneẕjw benách ka' che Jesusen' da' žiážjegekle'. Le we' gan chejnníta'gak benne' ka' ẕḻá'gake' ližle.
14 Le nnable Dios gon chawe'e benne' ka' ẕbia ḻáže'gake' ḻe'e. Le nnab gak chawe' chégake', na' bi wžiale ḻégake' ẕia.
15 Le yebél tẕen ḻen benne' ka' žebégekle'. Le kwéžeḻen benne' ka' ẕbéžegake'.
16 Le gak toze ḻen lježle ka'. Bi wká'n ẕen kwinle, san le gonḻen tẕen benne' gax̱jw ḻaže' ka'. Bi gekle ba naple dot yeḻa' žejní'il.
17 Bi yebi'ile che nitó benne', bi gonle da' ẕia che no benne' žone' chele da' ẕia. Le gon da' nak chawe' chegak yógo'te benách.
