ROMANOS 12

1

2

3

4

5

6

7

8

9

10

11

12

13

14

15

16

¹Ẕí'na'do' ka'. Dios žeyache' ḻáže'le' žo'o. Che ḻen žáta'yoela' ḻe'e wdé kwinle ḻo na' Dios, na' gakle ka to da' nak ban da' ẕdežo ḻaw Dios, nich gakle che Ḻeze', dan' naken to da' žaz ḻaže' Dios. Da' ni žaḻa' gonle, da' naken tḻebe ḻen da' ẕka'n ẕenžo Dios.

²Biž gonle tḻebe kan žongak benách ka' nníta'gake' ža ni zoažo na'a, san le gak benách kobe ka' dan' ba bkob Dios yichj ḻáẕdo'le. Le gon ki nich gak nnézlele da' chawe' da' žénele Dios gonle, dan' žaz ḻaže'e Ḻe', na' da' naken dot li ḻaže'.

³Na'a, dan' zoa da' bde Dios ḻo na'a, žapa' yógo'tele: bi wká'n ẕen kwinle, da' bi žaḻa' gonle, san žaḻa' gakle gax̱jw ḻaže' kan ẕza' ḻáže'le, na' kan nak yeḻa' žejḻé' chele da' benn Dios che chele.

⁴Kan nak toze beḻa' žen chežo, ḻa'kze da' zan da' ka' zej dan', na' kege toze žin žon to to da' ka',

⁵ḻezka' naken chežo. Ḻa'kze benne' zan nakžo, nakžo ka toze beḻa' žen dan' nžagžo žo'o Benne' Criston', na' che ḻen yógo'težo nakžo toze tožo ḻen yetožo.

⁶To tožo nzi' ḻo na'žo to da' benn Dios chežo, na' nža' to ton kan nak da' benne' che chežo. No benne' Dios bneẕjwe' chie' wchaḻje' ḻo wlaze' Ḻe', ḻen yeḻa' žejḻé' chie', žaḻa' wchaḻje'.

⁷No benne' Dios bneẕjwe' chie' gone' x̱chine', cháwe'do' žaḻa' gonen'. No benne' Dios bneẕjwe' chie' wsedle' benách ka', cháwe'do' žaḻa' wsedle' ḻégake'.

⁸No benne' Dios bneẕjwe' chie' wzejni'ile' benách ka', na' cháwe'do' žaḻa' wzejni'ile' ḻégake'. No benne' bi da' wneẕjwe' che no benne' yoble, dot ḻaže'e žaḻa' wneẕjwen'. No benne' ẕnna bi'e benách ka', ḻo yeḻa' gax̱jw ḻaže' žaḻa' gonen'. No benne' žákḻene' lježe' ka', ḻen yeḻa' žebél žaḻa' gonen'.

⁹Žaḻa' ží'ilele lježle ka' dot ḻáže'le. Le wzóa da' kegle cheḻa'ale. Le we' ḻaže' gonle da' naken chawe'.

¹⁰Le ži'il lježle ka' kan nži'il kwinkzle. Kan žaple ba la'ne lježle žaḻa' gonle ga gakže' benne' blo.

¹¹Le gon chóchteze ḻáže'le, na' bi wedle. Le gon x̱chin X̱anžon' dot ḻáže'le.

¹²Le yebél dan' zoa da' žx̱en ḻáže'le. Le kwez ẕen ḻaže' kate' bi ẕzáka'le. Le wcháḻjḻenteze Dios.

¹³Le wneẕjw benách ka' che Jesusen' da' žiážjegekle'. Le we' gan chejnníta'gak benne' ka' ẕḻá'gake' ližle.

¹⁴Le nnable Dios gon chawe'e benne' ka' ẕbia ḻáže'gake' ḻe'e. Le nnab gak chawe' chégake', na' bi wžiale ḻégake' ẕia.

¹⁵Le yebél tẕen ḻen benne' ka' žebégekle'. Le kwéžeḻen benne' ka' ẕbéžegake'.

¹⁶Le gak toze ḻen lježle ka'. Bi wká'n ẕen kwinle, san le gonḻen tẕen benne' gax̱jw ḻaže' ka'. Bi gekle ba naple dot yeḻa' žejní'il.

¹⁷Bi yebi'ile che nitó benne', bi gonle da' ẕia che no benne' žone' chele da' ẕia. Le gon da' nak chawe' chegak yógo'te benách.

¹⁸Cha' sáke'le, le kwez chawe' ḻen yógo'te benách.

¹⁹Ẕí'na'do' ka', bi yezi'le wzón benách ka' ḻa' ḻe'eze, san le we' latje yebí'i Dios chegak benne' ka', dan' nyejw ḻe'e yiche la'y da' ẕnnan: “Nedkza' yezi'a wzón. Neda' yebi'a chegak benách ka'.” Ki wnná X̱anžo Dios.

²⁰Ḻezka' ẕnnan: “Cha' zoa no benne' bi ẕḻe'ele' le' chawe', na' cha' ẕdone', bneẕjw da' gawe'. Cha' ẕbiḻe' nis, bneẕjw da' ye'je'.” Kate' gono' ki, gono' ga yedoé'el bennen'.

²¹Bi go'o latje nna bia' da' kegle le', san wnná bia' da' keglen', wkonlo' žin da' naken chawe'.