4 Akaé! Ba wiàna rà pwâ wà tèpa âboro, â wà Pwiduée, âna wàé Pwiduée na é *tàrù, â é nye wakè na âjupâra. Ba jèe nye wii naa na *Tii Pwicîri pâ: Na gà tùra, co Pwiduée, â gà tàrù ma âjupâra. Tèpa âboro diri, âna rà côoina popai'gà. Â gà nye ciburà piétò, jii tàpé na rà pitòtigà. Psaume 51.6
5 Napwa naa goo pâ tûâ kâjè na èpà, âna rà paari pâ, nye ticè èpà goo Pwiduée. Â gée goo kaa pwiri, â rà ina pàra tàpé pâ: «Càcaa wâdé wiàna é pwa wârimuru tâjè wà Pwiduée, ba pâ tûâ kâjè na èpà, âna paari pai wâdé kêe!»
6 Akaé! Ba wiàna wàrapwiri, â pwiri càcaa tàrù ê pai pwa kà Pwiduée, â pwiri o wànau târa cè pai tèi kêe tèpa âboro ni gòropuu?
7 Â wâgà, pwiri gà pwacèwii tàpéebà, â gà gére niimiri pâ ‘Ê pâ tûâ kôo na èpà, âna paari pâ, piwéna jiijè ê pwina é pwa wà Pwiduée. Â jè côoinari pai muugère kêe goo. Êkaa na càcaa tàrù na é pwa wârimuru tôo goo wà Pwiduée.’
8 Bwa. Gà cibwaa ina pwiri. Ba nye ipaiwà na jè ina pâ: «Wâdé na jè pwa na èpà, ba na o tèepaa ê pwina wâdé!» (Â pwa pàra tèpa pwâ na rà ina pâ, go ina pwiri. Â wà tàpéebà, âna pâri ma pwa wârimuru tàra.)
9 Jè ina pâ wànau naa goobà, wàibà tèpa Juif? Gona bà piwéna jii wà pàra tàpé na ara Pwiduée? Bwa! Càcaa wàrapwiri! Ba go jèe nye ina pâ: Êdiri pâ âboro, âna rà jèe cau piênawéna kâra ê auniimiri kàra na èpà—wà tèpa Juif ma wà mwara tàpé na càra caa tèpa Juif.
10 Ba jèe wii naa na Tii Pwicîri pâ: Nye ticè pwi jè âboro cèna é tàrù na ara Pwiduée. Nye ticè ji pwina caapwi wàé!
11 Nye ticè jè âboro cèna é wâro naa âjupâra. Nye ticè pwina é mudà Pwiduée!
12 Rà nye cau naa càùrà naa goo Pwiduée. Rà cau tèpa âboro na rà èpà. Nye ticè na pwa na wâdé. Nye ticè ji pwina caapwi wàé! Psaume 14.1–3
13 Na rà tùra, âna pimo; piârailu ûmemeerà. Ba rà pigòé ma tubé. Psaume 5.10 Popai kàra, âna pwacèwii aru. Rà utijè pwacèwii dòèa. Psaume 140.4
14 Maina tojii na pwârà. Jè maagé goo pwâratùra kàra. Psaume 10.7
15 Rà nye itàa co, nau ipòtàmwara.
16 Wâna rà pâ wê, na rà tòdidiri. Rà câmi ê aré ma tojii.
17 Càra caa tâmogòori ê naigé mara pinaanapô. Ésaïe 59.7–8
18 Ba càra caa papwicîri Pwiduée. Psaume 36.2
19 Napwa naa goro ê *Naèà, ma ê pâ popai na wâna, âna mara tatée wà tàpé na é naa ba kàra ê Naèà wà tèpa Juif. É paari diri pâ tûâ kà tèpa âboro na càcaa *tàrù na ara Pwiduée, â na ée mwa pitèirà goo. Â nye ticè jè âboro naa gòropuu diri cèna pâri ma é ipwamuruê.
