1Leli ya ti mə̀səra njəɗa ge Melefit a lala ni ti ahà r à ɗəm məjənaki ndam ya ti tə̀sər njəɗa gayaŋ faŋ do ni. Ahà r à ɗəm mà gray ere ye ti məɓəruv geli awayay ni ciliŋ ba.
2Ahà r à ɗəm ku way way do mâgray ere ye ti à ɓəlafəŋ kà maslaŋa ya ti kà gəvay gayaŋ ni ga məjənaki naŋ ti môru kama kama e divi ga Yezu vu.
3Aɗaba *Krist day à gray ere ye ti məɓəruv gayaŋ awayay ni ciliŋ ndo. Àbu məbəkiani nahkay hi : « Bay Melefit goro, tìndivia kur a, ay gatay ya ti tìndivi kur ni tìndivi ti nu. »
4Ma ge Melefit ya tə̀bəkibiyu ni ɗek ti ga məɗəfiki zlam ana leli. Tə̀bəki ti, ti mə̀mbrəŋ məfəki ahà r geli ke Melefit ba, mâzay njəɗa geli ti mə̂sər ere ye ti Melefit à ɗəmbiyu amagray ni ti amagray eɗeɗiŋ.
5Melefit ti avi njəɗa ana leli ti mə̀mbrəŋ məfəki ahà r geli ka Yezu ba. Nahkay mâgray ti *kânjəhaɗumkabu à na sulumani, ma gekʉli mârakaboru, akaɗa ga Yezu Krist ya awayay ni.
6Tamal kəgrum nahkay ti akəzləbum Melefit Bəŋ ga Bay geli Yezu Krist ka ahar bəlaŋ, à na məɓəruv bəlaŋ.
7Nahkay ti ahà r à ɗəm ku way way do e kiɗiŋ gekʉli bu mə̂gəskabu maslaŋa nahaŋ akaɗa ge Krist ya ti à gəskabu kʉli ni. Tamal kəgrum nahkay ti mis atazləbay Melefit.
8Nə̀ɗəm nahəma, Krist ègi bay məgri tʉwi ana ndam *Zʉde ; à gray nahkay ti aɗaba awayay ti tə̂sər ma ge Melefit ti ma ge jiri. Nahkay à ra ti ga magray ere ye ti Melefit à hi ana ata bəŋ ga bəŋ gatay amagravu ni.
9Nahkay day à ra ti, ti ndam ya nday ndam Zʉde do ni tâzləbay Melefit aɗaba tə̀sia cicihi a, à gria sulum gayaŋ ana tay a. Àbu məbəkiani nahkay hi : « Nahkay ti anazləbay kur à na limis kè meleher ga ndam ya ti nday ndam Zʉde do ni, anəɗəm nak Melefit. »
10Àbu məbəkiani keti : « Lekʉlʉm ndam Zʉde do ni, mərumvu akaba ndam ge Melefit ni. »
11Ka məlaŋ nahaŋ day à bu məbəkiani nahkay hi : « Lekʉlʉm ndam Zʉde do ni ɗek zləbum Bay Melefit. Ahà r à ɗəm jiba gərgərani ni ɗek tâzləbay naŋ. »
12Izayi day à bəki a wakita gayaŋ ni bu nahkay hi : « Maslaŋa nahaŋ amara, maslaŋa gani nani wur huɗ ge Zese, aməgur ndam ya ti nday ndam Zʉde do ni, mək nday atəɗəm wur ni aməgri sulum gayaŋ ana tay. »
13Melefit mâgray ti kə̂mərumvu dal-dal akaba kânjəhaɗumkabu à na sulumani aɗaba kə̀bum kəfumki ahà r ; mə̀səra ara agri ere ye ti à ɗəm ni ana leli. Nahkay akəsərum aməgri sulum gayaŋ ana kʉli, akəmərumvu à na naŋ dal-dal. Zlam gani nani ɗek amagravu ti à na njəɗa ga *Məsuf Njəlatani.
14Bəza ga mmawa, nu ti nə̀səra lekʉlʉm ti ndam sulumani dal-dal, kə̀sərumkaba ma ge Melefit a lala, kə̀səruma macahi zlam ana mis ndahaŋ e kiɗiŋ gekʉli ba daya.
15Ay a wakita goro ni bu ka məlaŋ ndahaŋ nə̀biki ma ana kʉli ga mələgiani ana kʉli ti, aɗaba nawayay ti kə̂sərumki ka ma gani lala. Nà gray nahkay ti aɗaba Melefit à grua sulum gayaŋ a
16ga məgri tʉwi ana Yezu *Krist azuhva nday ya nday ndam *Zʉde do ni. Nə̀ɗəm nəgri tʉwi ana Melefit ciliŋ, nəhi *Ma Mʉweni Sulumani gayaŋ ana mis, ti ndam ya ti nday ndam Zʉde do təfəki ahà r ka Yezu ni tîgi akaɗa ga sədaga ya təvi ana Melefit, à ɓəlafəŋ ni. Nday gani nani ti tìgia njəlatana à na njəɗa ga Məsuf Njəlatana.
17Tʉwi gani nani ti nəgri ana Melefit à na njəɗa ga Yezu Krist, nahkay nazləbavu à na naŋ kè meleher ge Melefit.
18Pakama goro ya nawayay nəɗəm ni ti à bi, nəɗəm ti pakama ge tʉwi goro ya nà gray à na njəɗa ge Krist, ti ndam ya ti nday ndam Zʉde do ni tə̂gəsiki ma ni ciliŋ. Tʉwi gani nani à gravu ti à na pakama ya nə̀hi ana mis ni, à na zlam ya nà gray ni,
19akaba à na zlam njəɗa-njəɗani gərgəri ya à gri ejep ana mis ni. A tʉwi gani nani bu ɗek ti *Məsuf Njəlatani à ɗəfiki njəɗa gayaŋ ana mis. Nahkay nə̀hia Ma Mʉweni Sulumani à ki ke Krist ana mis ga kəsa ɗek ; nə̀njəki a Zerʉzalem, nòru à na naŋ bəɗak ka haɗ Iliri.
20Nə̀hi ana ahà r si nakoru nəhi Ma Mʉweni Sulumani ana mis ka məlaŋ ya tìci ma ge Krist ɗay-ɗay ndo ni kwa. Nà gray nahkay ti, nà wayay magray tʉwi ka məlaŋ ya ti mis ndahaŋ tə̀njəkia ni do.
21Nə̀ɗəm si nagray tʉwi akaɗa ya à bu məbəkiani a Wakita ge Melefit bu ni : « Ndam ya tə̀hiki ma ana tay ɗay-ɗay ndo ni etipi naŋ ; ndam ya tìci ma gayaŋ ɗay-ɗay ndo ni atəsər naŋ. »
22Sak ehimeya nà waya marona afa gekʉli a, ay nə̀ŋgət ahar ga moroni ndo ni ti azuhva tʉwi nani.
23Vi ehimeya nà waya məmənjiyu kʉli a, ay tʉwi à cafəŋa nu a. Ay nihi ti tʉwi goro à bi ka haɗ nday ndani va bi.
24Nahkay nawayay nakoru ka haɗ Espeŋ ti nəɗəm nakoru nəhuriyu gwar afa gekʉli day. Tamal nìnjʉa ti ananjəhaɗ afa gekʉli gosku ɓal, anəmərvu akaba kʉli. Kələŋ gani akəjənumki nu ga moroni e mirkwi goro ni.
25Ay nihi ti nakoru a Zerʉzalem ga məjənaki ndam *njəlatani ge Melefit ya tə̀bu eslini ni.
26Aɗaba ndam geli ya ka haɗ Mesedʉweŋ akaba ya ka haɗ Eseyi ni tà waya majama zlam ga məjənaki ndam talaga e kiɗiŋ ga ndam njəlatani ge Melefit ya tə̀bu a Zerʉzalem ni ba.
27Nday ndayani à na ahà r gatay tə̀jalay mək tà gray nahkay. Nday ya ti nday ndam *Zʉde do ni ti tajami zlam ana ndam Zerʉzalem ti kigeni, aɗaba ndam Zerʉzalem ni tə̀jənakia tay ga məŋgət zlam sulumani ge Melefit a ; nihi ti ahà r à ɗəm nday day tə̂jənaki ndam Zerʉzalem ni, tə̂vi zlam ya à həcikivu ana tay ni.
28Ka ya ti eninjʉa à na zlam na ɗek, anəvia ana tay a ni ti, anoru ka haɗ Espeŋ ; ka ya ti nakoru nahəma anəhuriyu afa gekʉli.
29Nə̀səra, eninjʉa afa gekʉli a ti *Krist aməgri sulum gayaŋ ɗek ana leli.
30Bəza ga mmawa, leli ɗek ndam ga Bay geli Yezu Krist ; avi njəɗa ana leli ga mawayavani ti Məsuf gayaŋ. Nahkay nihindi kʉli, nawayay ti kə̂zum njəɗa gekʉli ɗek ga mahəŋgalumu Melefit.
31Həŋgalum Melefit ti ndam ga haɗ *Zʉde ya tə̀fəki ahà r ka Yezu do ni tə̀gru daliya ba, ti ndam ge Melefit ya a Zerʉzalem ni tə̂gəskabá zlam ya anəzikaboru ana tay na lala.
32Nahkay ti tamal Melefit à vua divi gana ti eninjiyu afa gekʉli à na məmərani, anəpəs akaba kʉli gʉzit.
33Melefit ti avi manjəhaɗ sulumani ana mis ; nawayay ti mə̂ləbu akaba kʉli, mə̂vi manjəhaɗ sulumani gani nani ana kʉli ɗek. Aya nahkay !
