4 Asum̃a am̃areran ke ga nap̃a asape nalogearen ga navisaluaena naga pe mrapa, ana mrapa nene piowa rui, komin nap̃a ita make ga tekilaro navisaluaena lala. Mrapa nap̃a tesape temesmesu temio Ntewa komin nap̃a temlogear navisaluaena, Kristo suwo rui, a naga miyum̃aen kieta mrapa viu tai. A nagane, visae telelaga tevisave Kristo p̃ar plan kieta mlamulen viowa lala, ana Ntewa kilia kila ita teim temesmesu e marana.
5 Visae ve tekilaro re navisaluaena, yoko woga ga, tekilia teim temesmes e marana Ntewa komin nap̃a temlogear navisaluaena, komin Mosis pisa visena tai e lepas nene rui, pisape “Yaru nap̃a taveve ruru sur make ga nap̃a navisaluaena nene pisa, yoko tol malena.” Ana pe yar re tai nap̃a kiena malena po sa nap̃a Mosis pisa poli, ana tap̃atete tetol malena kome kieta yum̃aena wo la nap̃a tekila.
6 Nakilaen sanene, naga m̃arera pap̃isi, ana visae telelaga ga e Kristo tekilia teim temesmesu e marana Ntewa, a naga pe pe sur re tai nap̃a m̃arera poli. Sane visena tai nap̃a Mosis pisa, nap̃a pisape “Pe pon re asitom avisave sur nene m̃arera pap̃isi, ana asum̃a aviuviun avisave ane yoko kilap̃esan mrapan ita vena vaen ma e peni?” Naviunena nene kana kinasa sape ane kilia va tol ma e peni were Kristo vitom tano e nini vena tamalia ita, ana sitomena na sanene piowa ga.
7 Pona aviun naviunena tap̃ena nap̃a sike e Nasiriena Wa la yo, nap̃a sape “Ana ane kilia vito tano vito tol yo kiena yar mare lala ana wasup̃e sina?” Naviunena nene, kana kinasa asitom sape Kristo mare e lak torovia, ana naga m̃ena ga pito sike e lelen marena, ana asitom asape tap̃atete yar tai kilia vito si werelua naga e yo nene vena vam tamalia ita, ana tekilia tesape visena la nene pe po re poli. Tekilia ruru rui tesape Kristo molue ma e peni pitomi tano rui, a siraunia mare, p̃isi na naga sum̃alu mal sina a pa si ma e peni rui.
8 Visae ve sanene, tekilia tevisatam̃e naviunena la nene, tevisa visena tap̃ena nap̃a Mosis pisa nanua sumo, nap̃a pisa pisape “Visena kiena ne Ntewa nap̃a pan ita ita yeririna lala sike amio ita rui. Sike e limata, ana tekilia teligan se gota, tekilia teligan ruru se kieta sitomena lala.” A visena kiena ne Ntewa nap̃a visena nene pisayuia, nane Lologena Wo nap̃a mesum̃a melologon ke ne, nap̃a pisawal ke sape yar lala monar alelaga e Yesu Kristo.
9 A ko ai nap̃a olelaga e Yesu Kristo e losinem̃a, ovisave Ntewa naga kila naga mal si petan marena, a okekaran nap̃a ovisawal e yo metava ovisave omla Yesu pe kiom̃a Sup̃e, yoko otol malena.
10 Nanene komin nap̃a visae yar nap̃a lelaga e losinena visave Yesu naga mal sina petan marena, a visawal e yo metava visave Yesu naga pe kiena Sup̃e, yoko Ntewa ve la re si nakoaena vania komin kiena mlamulena viowa lala, yoko tamalia naga.
11 Naga nene sane visena tai na Siriena Wa, nap̃a sane pisayu nap̃a temlelaga e Kristo, nap̃a pisape “Yaru nap̃a mlelaga ea, naga tap̃atete kiena sitomena loru pog tai.”
12 Yaru nap̃a mlelaga naga pe Yu yo, pona naga pe pe Yu re poli, ana Sup̃e naga taaga pe kiela sup̃e la punu ga, kila make po pan la nap̃a atag ke pania.
13 Naga sane visena tai nap̃a Navisawalena Soel siriyu nanua sumo, nap̃a sape “Yaru ai nap̃a vio kia kiena Sup̃e, yoko tamalia naga.”
14 Ana lelaga, le Yu la mok liu nap̃a pe apio re Kristo asape tamalia la poli, ana sanape na sanene? Nanene komin tap̃atete avio naga visae ve alelaga re ea, a tap̃atete alelaga ea visae ve alogeli re kiena kia pogos tai, a tap̃atete aloge kiena kia visae ve yar va lologon re van la.
