1“Nini nakaukavu vaivaikala ane ꞌo ulai noxou angelo noxiꞌa ta mitema noxou Lataua ne Saludesi. Itema ane mutetelisiꞌa ta ulee muxatele tamei noxou Lataua mo ta oto muxatele tamei uvikala aloxo ꞌo, ‘Eni elavusou ꞌiliꞌilixomengi. Ta mitema ivikala lexe ngingi loxo ngemauli, ia uasi to ngingi loxo ngesoisoli.
2Ngingi ngatulu mo ngaavutunoxou mii maꞌia ane uxoxolu noxinge sio ia ꞌalaꞌalaisou ukalu. Xo eni amaisou ꞌiliꞌilixomenge uxali laixe mo umomomo no iou Lataua noxilo uasi.
3La sou ngaxavutalanu mii maꞌia ane ngingi ngelomusou mo ngenoꞌu. La sou ngamulinu mo ngaxiu tumalingeu ꞌiliꞌilixo masumasua. Ia lexe ngingi ngatulu uasi, la eni aneꞌe akulukengengi loxo itema sou pakali uneꞌe. Ia ngingi ngalavusou aso iou ane eni eneꞌe no anu uasisi manina.
4Ia ta mitema moseꞌi no taiingengi ne Saludesi ne, aneꞌi mitaanu tokolomo nuniꞌu uasi. Nexi noxiꞌa tatokolomoxu tokolomo kea mo noxiꞌa tamuamuaꞌi takei, xo aneꞌi mimomomo.
5Anu ane muuaulixu ꞌotoꞌoto ne, la anu utokolomoxu tokolomo kea loxo aneꞌi. La sou eni umomomo sou aiasou ualasou no anu lavuku sou mauli uasisi manina. Ia eni amoxoꞌu ualasou no iou Mamilo iloꞌa ta angelo noxou.’
6ꞌEi ane sangalou, la ulomusou vaikala ane Uleenu Tavuna muvikalaneꞌi ta mitema noxou Lataua no anu laixe.”
7“Nini nakaukavunu vaivaikala ane ꞌo ulai noxou angelo noxiꞌa ta mitema noxou Lataua ne Piladelupia. Vaivaikala ane ꞌo ne, noxou ane noxou Lataua mo uvikala lexe uꞌoxonu maꞌia la Anu umulinu. Anu utetelisou xavi sou usaxilaꞌu siliko sou aitenga. Loxo Deviti la sou Anu ukisiinu aitenga, la umomomo sou evile utatusou uasi. Xe Anu utatusou aitenga, la umomomo sou evile ukisiinu uasi.
8Eni elavusou ꞌiliꞌilixomengi, la sou ngamaisou eni ekisiinu aitengasinge mo a ututulu no laxungengi. Aitengasinge ne, umomomosou evile utatusou uasi. Mo eni elavusou lexe ngingi xavi sevile a uxoxolu, la ngingi ngemulinu vaivaikala noxilo mo ngatalume noxilo uasi.
9Ia ngamaisou, ta mitema ane ipita noxou Satani aneꞌi meꞌa imoxoꞌa lexe aneꞌi ta Iutaia ia uasi, aneꞌi ta mitema sou kalakalavoi. La eni aꞌoxoneꞌi ineꞌe itangatulu no tavainge mo ilavusou lexe eni emasaxainge.
10Ngingi ngemulinu vaivaikala noxilo mo tuꞌutuꞌumaxu muxalisinge la ngexolu seꞌisisi, la sou eni asaxilaꞌinge no anu voxo sou tovotovo. Voxo sou tovotovo ne, anu ꞌalaꞌalai sou uxali no xalexalee tuatuala no lia ꞌo ukalusi sou utovoneꞌi aneꞌi ane mixolu no lia ꞌo.
11Eni ꞌalaꞌalai sou alivu aneꞌe, la sou ngingi ngatetelisou pekiaꞌu mii maꞌia ane ngingi ngenoꞌu, mo sou evile umomomo sou uꞌumenu kisivalu no kisinge muxamuxaxu uasi.
12Anu ane muaulixu ꞌotoꞌoto ne, la eni aꞌoxonu loxo atulusou tani tila noxou Lataua noxilo. Anu umomomo sou uxexee uasi mo eni akaukavunu ualasou Lataua noxilo no anu. Mo eni akaukavunu ualasou tuala noxou Lataua noxilo, anu Ielusalemu alavua. Ielusalemu alavua ne, anu molu teitexi noxou Lataua noxilo uluꞌe. Mo eni akaukavunu ualasilo alavua no anu kalumo.
13ꞌEi ane sangalou, la ulomusou vaikala ane Uleenu Tavuna muvikalaneꞌi ta mitema noxou Lataua no anu laixe.”
14“Nini nakaukavunu vaivaikala ane ꞌo ulai noxou angelo noxiꞌa ta mitema noxou Lataua ne Laodekia. Vaivaikala ane ꞌo ne, noxou itemasou Manina, Anu uvikala lexe uꞌoxonu mii maꞌia la Anu umulinu vaikala noxou mo Anu muaꞌaloxu aꞌalo laixe noxou Lataua mo Anu usaxilaꞌu mimii latala ane Lataua mukoinu mukalusi.
15Ia eni elavusou ꞌiliꞌilixomengi. Ngingi xavingengi malaxo uasi sou ngamulinu vaivaikala noxilo loxo lexa lelemesou xe ialuxu uasi. La sou eni emasaxa lexe ngingi ngaxali loxo lexa ialuxu, xe uasi la ngaxali loxo lexa lelemesou.
16Tavaꞌu xo ngingi loxo lexa ialuxu mo lexa lelemesou uasi, ia ngingi loxo lexa ialuxu malaxo uasi, la eni ꞌalaꞌalai sou aexingengi uuatu no anaxo.
17Ia ngingi ngavikala lexe. ‘Eni amitema sou lavuluti. Eni enoꞌu mimii iouiou mukalu, la sou eni emasaxau mii vile la uasi.’ Ia ngingi ngalavusou lexe xoluxolungengi ne masumasua uasi. Ta maula moso ngalavusou lexe ngingi ngexolu vitanisi mo iengi seleveenu xe paxapaxainge uasi.
18La sou eni apeletotosinge lexe ngingi ngalotonu xoulu noxilo ane mielaxu no navu mo muxali alavua la sou ngingi ngaxali itema sou lavuluti, la sou ngingi ngalotonu tokolomo kea noxilo mo ngataanu sou utaluxu vasimenge e paxapaxaꞌu, la ngamaela uasi. Mo ngalotonu lamalasile noxilo sou iengi, mo sou ngamalei.
19Aneꞌi ane eni emasaxaiꞌa, la eni akaitoloneꞌi mo apuasiꞌa. La sou xavingengi mo ngaxiu ꞌiliꞌilixomengi.
20Ngamaisou! Eni a atutulu no aitenga mo apolopolo. Lexe ꞌei ane ulomusilo mo ukisiinu aitenga, la eni aꞌunalai mo nexi noxou taꞌani tapita.
21Noxou anu ane muaulixu ꞌotoꞌoto ane ne, la eni apamatolanu sou nexi noxou taxolu no xavi muxolu no anu, loxo eni euaulixu ꞌotoꞌoto ne la nexi noxou mamilo texolu no luusou.
22ꞌEi ane sangalou, la ulomusou vaikala ane Uleenu Tavuna muvikalaneꞌi ta mitema noxou Lataua no anu laixe.”
