1Na soha rori ajara ꞌahi namijiꞌi kavume hanuha soha vaji rene ajima ro ꞌeꞌunana. Huni húmata iropu noꞌone atana iropu ropune ꞌee huni atana ꞌaha koraunu iropu ropu navume ꞌee huni húmata ꞌahijaho iha siseapo navara.
2ꞌEnakaivo hanuha kaꞌene nara kavujaho pusia niꞌimaꞌura saꞌine huni mumorijaho pea saꞌine huni irijaho raioni jihuni irijaꞌina. ꞌEjume anakijara huni harura ꞌee huni toronua ꞌee hura ꞌajohujaho mahoꞌo mahana.
3ꞌEꞌejume na kavume huni húmata pina kwamajaranana. ꞌEꞌeme huni matana kaꞌene rejume hu kwamajaranajaho vejume maranana. Ea mapoka kaꞌene iki mweꞌi hijujija ijí kame oja hwaꞌusaꞌahume hanuha kaji ꞌararihaara.
4ꞌEne pu anakiji oja mahara. Ijihuni maijaho hu huni harurijaho hanuha mahana. ꞌEe pu hu oja mahe ijá ꞌwava Ea irara hanuha ike vareꞌine ꞌee ea irara hu huꞌúmo ajira veꞌena? ꞌwavara.
5ꞌEne hu masapa mapoka mapoka (42) vajijino hine ira sisea ꞌwarame ꞌee Godi matahana. ꞌEjiꞌi hu areri ani ani vehuni harura mahana.
6ꞌEjumakame hu ira avwame Godi ꞌee Huni iha matahe ꞌee Huni hari ara matahana. Ijaho ea kaꞌene akúpi ꞌahi hijujija matiha avanana.
7ꞌEne Godoni eijihi puꞌúmo ꞌarahe asitahuni harura mahana. ꞌEe harura kaꞌene kachiꞌina ea ira ani aniꞌina ꞌee kwaa ara ꞌajoahunijaho mahana.
8ꞌEjakame ea mapoka kaꞌene mweꞌa kaki hijujija ꞌee mweꞌakaho maiꞌo parejiꞌinijino ea irahuni iha majama hihuni puka vaji panavajipo hanuhiji oja mahuna. Ijí majama hihuni puka ijaho Remu kaꞌene kwamaji Huna.
9ꞌEnakúne ea irara ataa rukina reꞌamajaho ataa apúsama hena.
10Ea irara tipurai vahuna reꞌamajaho hu tipurai vahuna. Ea irá soꞌwi ea ꞌanaa kwaꞌamajaho hu ꞌuꞌo soꞌwi ꞌanaa kwahuna. Ijihuni hahi Godoni ehija masuani hine puni nimaaroa ija kisi ꞌunanahuna.
11ꞌEnarena na kaꞌeme hanuha pina mweꞌa vaji rena ro ajimana. Huni atana noꞌoheꞌijija sipi ꞌuꞌua saꞌina. ꞌEne hu anaka huni iri ꞌwaramana.
12Hu hanuha amuri jihuni haruriji apene huni unaꞌi mina piramana. Hura venaume mweꞌa ꞌee ea kaꞌene ijí hijujija hanuha amuriji oja mahara. Ijihuni maijaho huni matana kaꞌene rejume hu kwamajaranajaho vejume marana jihunaꞌe pu oja mahara.
13Hanuha kaꞌene túnaꞌi roajarahara uneunecha ea areri pavehunijija venana. ꞌEne hu vejume vena akúpi ꞌahi rena ariha emaapuni unaꞌi roana.
14Uneunecha ani aniꞌina kaꞌene hu venajaho hanuha amuri jihuni unaꞌi huna venahana. ꞌEne hu mweꞌa ikehuni ehijijija mahoꞌo pisimisamana. Hu mweꞌa keꞌura ꞌwaravume hanuha amura kaꞌene soꞌwi pijaharaꞌomo ꞌurinajihu vareꞌina veha ꞌiamana.
15Hanuha kaꞌene hanuhijihu vareꞌina oja rukina rene ira ꞌwaraꞌamarono harura mahana. ꞌEjakame ijí hanuha kajara ira ꞌwarave ea hu oja pamaꞌavajaho ꞌanie kwamasahuna.
16Hu venaume ea mahoꞌo ea maꞌuꞌua ea mamaꞌina kukua rukina pivusahiꞌina matauma ojiꞌina ꞌee pwea ijijahija ijá puni ija manaꞌina ꞌee puni varipata ꞌahi huni aacha irechahuna ꞌwaramana.
17Ea irara aacha kaꞌene hanuhi jihuni iha ho iha kajihuni asura paapeꞌamajaho hu areri paꞌimene ꞌee kukua paꞌeka vaꞌe ꞌimehuna.
18Henaka nimaijaho ikena. Ea irara kama hejiꞌina reꞌamajaho hanuha kehuni asura kehuni maijaho sama piunaꞌamana. Emai huni asura kaꞌene tahunijaho 666.
