1Iy ndramak doh tiye jo ja i buku doh, “Ou atorou rayah sahou kili ta angelo ere bwena tiri lau ta Kindrei are kon Sadis. Sahou kili buku doh: ‘Jo le ari badeh, atondrok oro Malawin Mwasin ta Kindrei ma ndro taloh, ma hawe iri mwan ma badih ta Kindrei, buku ndrau, badu kon ma ndro taloh. Jo badeh, ndratanan iri kandriyen marakon aha amekes. Iri lau rayah badeh, asehek nyala aha anya, “Iri mwan ma badih ta Kindrei badu Sadis, a-en hamon ta kandriyen mwasin, ma iri a-en hamon handru ta Jises Krais.” Arile, bwe. Aha badeh, ndra buku ndramak imek. Aha ale bamekes gok badeh, bame tek bwe.
2Aha kasuri aha ja, ma aha kabudon kamwenen op! Saba kandriyen tek ale aha a-en hamon ta aliy badeh, jo aso-ok aha katawiy kihis, kandriyen doh anya kimek ai! Tasah, iri lakou mara-ei aha amekes kede-eh badeh, rayah bamwenen ta mada Kindrei tek ja bwai.
3Aha kabudon kili hamon ja ta len ma mwena mene aha anuhun sahou tek mwasin, ma aha atehei budon handru taha in aliy. Eme nadah, aha katubuni ndrine aha ma ka-en hamon ta sahou handru ma bwena mene ja. Buku bwe-eh, jo kameh ewek hawe aha i buku ndramak ta bahana, ma aha kameh winiyan bala tanan ta len, jo kameh ewek bwe, ma jo kameh edeu ndramas ndra-in labai ewek taha ale.
4‘Arile, iri lau mwan ma badih ta Kindrei taha rayah badu kon Sadis badeh, bamekes kandriyen ndra-in bwe. Iri lau doh kameh adek hawek, ma asini awin belen mara-ei, tasah kandriyen tiri mwasin mara-ei.
5Buku are mwan o badih ale ales boto-on udu bolo bahun nane balik amekes i tiri, ma iri baruwani budon tiri handru bwe, jo kameh edeu awin belen ili tiri, ma jo kameh winiyan basokosowei nyara iri udu bolo buk tiri ta akohok kohan handru ta Kindrei ba-au bwe, arile jo kameh asehek nyala tama hawe oro angelo tan i buku doh: “Iri lau mwan ma badih dah badeh, iri lau tek handru ma iri a-en hamon ta sahou tek.”
6Are mwan o badih ndranyen udu aliy, jo aso-ok iy kanuhun saba lakou handru, Malawin Mwasin asehek ili tiri lau ta Kindrei.’”
7Iy ndramak doh tiye jo ja i buku doh, “Ou atorou rayah sahou kili ta angelo ere bwena tiri lau ta Kindrei are kon Piladelpiya. Sahou kili buku doh: ‘Idah sahou tek amwenen. Jo badeh, ndrabun labai, ma jo kati iri kandriyen handru mari. Jo badeh, boto-on labai udu bolo tondrok ta kabin Debit. Buku jo sihi kou, ari ndramak winiyan basulu-iy ja bwe. Ya, buku jo sulu-i kou, ari ndramak, winiyan basihiy ja bwe.
8Jo ndratanan ta kandriyen marakon aha amekes. Nyamu aha kede-eh boto-on sese udu aliy, ma aha a-en hamon tiri sahou tek, ma aha ale babisini nyarak bwe. Eme ma aha ndranyolom ai! Jo badeh, amekes san ta aha winiyan atiye iri sahou tek. Ma ari mwan o badih ja kameh winiyan baturuki aha ta amekes lakou dah, bwe-en.
9Aha ndratanan iri lau ta balik kede-eh. Iri badeh, ado bolo asiu ta atukum tiri Juwis. Iri anya, Kindrei ndratehei kalem ndrala tiri, ta iri asahan lau tan, tasah iri badu Isra-el. Arile, iri bwai. Satan ndraruwi budon tiri, ma iri ndrala hawen. Aha kanuhun! Hamon kameh jo tiye iri ta awek hawe aha, ta atehei bwili ndru-u iri i andri udu mirihik ta kati aha, ma iri kameh atanan ta jo aso-ok aha labai.
10Aha badeh, a-en hamon ta sahou tek, ma aha ales boto-on labai tiri maha-an marakon. Eme ma, jo kameh atondrok aha ta iri lakou anya kasahan ta none iri mwan ma badih badu kon munyak mara-ei, idoh kameh winiya bandruni aha bwe.
11Ndrame mirihik ai, ta jo kameh eme hamon eme kon munyak dah ja. Eme ma iri budon tek mara-ei aha ndratawiy, badeh, aha katawiy kihis. Kora-on iri lau rayah kawendreyani aha ma aha kamani iri ndramas nane, jo anya kedeu kili tiri mwan ma badih nane a-en hamon tek handru.
12‘Buku are mwan o badih ale ales boto-on udu bolo bahun nane balik amekes i tiri, ma iri baruwani budon tiri handru bwe, iri lau doh kameh jo tutuni iri i buku ndru eh ta ateu asiu tinan ta Kindrei tek, ma iri kameh winiya bala manan ja bwe. Jo kameh torowenei nyara Kindrei tek udu bada iri, ma jo kameh torowenei nyara kon tinan ta Kindrei tek, Jerusalem ha-un doh udu mine Kindrei tek udu kandrah eme andri. Ma nyarak ari ha-un ja, jo kameh torowenei ili bada iri ale.
13Ya, buku are lau ndranyen udu aliy, jo aso-ok iy kanuhun saba lakou handru, Malawin Mwasin asehek ili tiri lau ta Kindrei.’”
14Iy ndramak doh tiye jo ja i buku doh, “Ou atorou rayah sahou kili ta angelo ere bwena tiri lau ta Kindrei are kon Leyodisiya. Sahou kili buku doh: ‘Iri sahou dah, tek amwenen. Jo badeh, kati iri sahou handru, ma jo badeh, ta atiye le sahou handru. Jo badeh, kati iri lakou mara-ei Kindrei ndrabwidiy. Eme ma jo suni sahou dah ewek taha.
15Jo tanan lakou mara-ei aha amekes. Jo ale tanan aha nyarahan o nyala-an. Jo badeh, aso-ok aha kado buku nyala-an o nyarahan le ka-i ai.
16Arile, bwe. Aha badeh, nyarahan sese le. Eme ma jo anya kamwitini aha ado bohok kame len.
17Tasah, aha badeh, asehek i buku doh, “Luk tahi badeh, solo-an labai, ma lakou rayah ja badeh, tahi mara-ei udu aliy. Ahi bandriliu ta ari lakou ja bwai.” Arile, bwe. Aha badeh, bateu lakou ta Kindrei handru nane ta aseben aha ja bwai. Eme ma manyah taha udu ndra-in mara-ei, winiya le iri lau baratikisi aha. Aha badeh, ndra buku iri lau, tiri ari lakou bwe, ma aha ndra buku iri lau, mada iri ndrakaseu, ma aha ndra buku iri lau, iri ari awin ta tubuloh bada iri bwe. Ma aha le amwenen kede-eh winiya bala tanan, aha are buku sah handru ta budon ta Kindrei!
18Eme ma, jo anya kedeu sahou dah kewek taha. Aha mara-ei badeh, kame le hawek kasih bek nyikilikin tek. Jih badeh, ndrasulumwi lakou marakon udu bwele-en ndra-au, ma bwidiy ndra nyikilikin mara-ei. Ma aha kameh asahan nadu batun. Ya, aha kame kasih taha kolau belen ta tubuloh bada aha, ma iri mwan ma badih winiyan banyolom bada aha ndrakane ja bwe. Ma mwasin ale, ta aha kame hawek kasih rayah ndrelekei tek, ta adeu i mada aha, ta aha kanyolom kon ja. Ma aha winiyan atanan, buku aha badeh, bateu lakou handru ta Kindrei bwe. Ma aha kameh winiyan anyolom aha are buku sah handru.
19Jo ibolosen i tiri lau, ma asehek nyala kandriyen iri amekes, tasah jo badeh, aso-ok iri labai. Eme ma, aha katubuni ndrine aha, ma katehei budon taha kirih ta a-en hamon ta Kindrei.
20‘Aha ndranyolom jo! Jo ales udu kona kou, ma jo alim kou. Buku are lau, iy anuhun bohok, ma iy sihi kou, jo kameh ili bolo asiu hawen, ma aimon nyamon hawen, ma iy aimon nyamon hawek.
21Ya, buku are mwan o badih ale ales boto-on udu bolo bahun nane balik amekes i tiri, ma iri baruwani budon tiri handru bwe, iri lau doh, jo kameh tiye iri kame hawek ma katondrok iri lakou marakon hawek, i buku tama aso-ok jo kamanyah kudu hawen ta atondrok lakou marakon.
22I buku ndranye aha udu aliy, jo aso-ok aha kanuhun saba lakou handru, Malawin Mwasin asehek ili tiri lau ta Kindrei.’”
