3 El fah karingin kom liki mwe ongoiya su oan in lukma, Ac liki kutena mas keok.
4 El fah afinkomi ke posohksok lal. Kom fah moulla ke karinginyuk lal. Pwaye lal ac fah mwe loeyuk lom ac mwe karingin lom.
5 Kom fah tia sangeng ke kutena mwe sensen ke fong Ku ke mwe ngal ke len,
6 Ku ke mwe misa in lohsr uh, Ku ke ma koluk su sikyak ke len.
7 Sahp sie tausin ac fah misa siskom Ku ngoul tausin raunikomla, Tusruktu kom ac fah tia sis kutena ma.
8 Kom fah ngetang ac liye Ouiyen kaiyuk nu sin mwet koluk.
9 Kom oru tuh LEUM GOD Elan mwe loango lom, El su Fulatlana El nien muta lom.
10 Ke ma inge wangin ma koluk fah tuku nu fom, Wangin mwe kunausla fah apkuran nu inkul sum.
11 God El fah sap lipufan lal in liyekomyang Ac karingin kom yen nukewa kom fahsr nu we.
12 Elos fah kafiskomyak inpaolos Tuh niom fah tia ngalyak fin eot uh.
13 Kom ac fah lolongya lion ac wet, Aok, lion sulallal ac wet pwasin.
