Psalm 78:21-71

²¹Ieowa lao mangier mepukat, ap kotin ongiongadar, o kisiniai wiauier ren Iakop, o ongiong lel ong Israel,

²²Pweki ar so kamelele Kot, o sota kaporoporeki a sauas.

²³A ap kotin masani ong tapok en poa kan, o ritingida wanim en lang akan.

²⁴O kotin kamoredi ong ir manga, pwe ren manga, o a kotiki ong ir prot en lang.

²⁵Irail kangalar prot en tounlang kan; a kotin kadar ong ir kisin manga toto.

²⁶A kotin kapwaredar pan lang ang en mas en lang, o ni a manaman a kotin kamokidada ang en pali air.

²⁷O a kotin kamoredi ong ir uduk dueta pwel par, o manpir dueta pik en oror.

²⁸O a kotin kapup irail di wasa karos, me irail kauson ia.

²⁹Rap mangamanga o medilar kaualap, o a kotin mueid ong ir ar inong.

³⁰A ni ar kapwaiadar ar inong, o ni ar mangamanga,

³¹Ongiong en Kot ap lel ong irail er, o kamelar ol lapalap re ’rail, o kotin wokiedi manakap en Israel kasampwal akan.

³²A re kalaudelar arail dip, o re sota kamelele a manaman akan.

³³I me a kotin mueideki ren mela, re sota paida, o ar apwal akan me toto arain ar maur.

³⁴Ni a kotin kame irail la, rap idok i, o wukila, o rapaki Kot.

³⁵O re tamandar, me Kot kele parail o Kot lapalap ar saundor.

³⁶O re lik sansal mau ong i ni au arail o re likam ong i ni lo ar.

³⁷A mongiong arail sota tengeteng ong i, o re sota dadaurata melel a inau.

³⁸Ari so, a kotin kalangan ong ir, o kotin makeki ong ir dip arail, o sota kame irail la, o katukiedi a ongiong pan pak toto, o sota ongiongi melel.

³⁹Pwe a kotin kupura, me irail pali uduk, dueta kisiniang, me pir wei o solar puredo.

⁴⁰Pan pak toto re kangudi ong i nan sap tan, o kakupur suedi i nan mal.

⁴¹Irail pur ong ansau karos kasongesong Kot, o re akapungi ong me Saraui ren men Israel.

⁴²Re solar tamanda lim a manaman, me dore ir ala sang ar imwintiti kan ni ran o.

⁴³Duen a kotin wiadar a manaman akan nan Äkipten o a dodok kapuriamui nan Soan.

⁴⁴A kotin kawuki ong nta ar pil akan, rap solar kak nima sang ar pilap akan.

⁴⁵Ni a kotin kapwaredar man sued akan nan pung arail, me kang ir ala, o pros akan, me kawe ir ala.

⁴⁶A kotiki ong muedi ar tuka kan, o ar wantuka ong man siek.

⁴⁷A kotin kawekilar akel ar wain o tuka kan ki akel tikitik.

⁴⁸A kotin kamekila ar man akel akan o ar pwin man akan liol.

⁴⁹A kotin ongiong melel o porone wong ir tounlang sued kai, o mueid ong ir, ren lingarangar, o morsued, o kainsensued.

⁵⁰A kotin kaonopa dang ongiong al apot, o sota dorelar maur arail sang mela, o kotin mueid ong kilitop ni maur arail.

⁵¹A kotin kamelar meseni karos nan Äkipten, meseni en ar kelail nan im en Am akan.

⁵²A kotin kaluala sapwilim a kan dueta pwin sip eu nan sap tan.

⁵³A kotin kalua irail ni pung, pwe ren der masak meakot, a madau kadupaledi ar imwintiti kan.

⁵⁴A kotin wa ir ala lel ni irair en sap saraui, lel nana wet, me lim a pali maun kileledier.

⁵⁵O kotin pakipaki men liki kan mo ’rail, o kotin nek ong ir sap arail, pwen sosoki, o a kotiki ong kainok en Israel akan, en kaukauson nan im arail.

⁵⁶A re songesong? o kaongiong Kot lapalap, o sota peiki ong i, o sota duki ong a masan akan.

⁵⁷O re muei sang o mamaleki meakaros, dueta sam arail akan, o re sota tengeteng, dueta kasik katieu luet eu.

⁵⁸O re kaongiong i ni ar kaudok pon dol akan, o re kupur suedeki i ki arail dikedik en ani kan.

⁵⁹A Kot lao kotin mangi mepukat, ap kotin ongiongada o kasapok ir ala melel.

⁶⁰A kotin muei sang tanpas a nan Silo, im pwal o, wasa a kotikot ia ren aramas akan.

⁶¹A kotiki wei sapwilim akan nan imateng, o a lingan nan pa en imwintiti kan.

⁶²A kotiki wei sapwilim a aramas akan ni kodlas, o kotin ongiongi sapwilim a soso.

⁶³Kisiniai kangala ar manakap akan, o ar peinekap akan solar kak papaud.

⁶⁴Arail samero kan mekilar kodlas, a solar li odi kan, me kin maiei.

⁶⁵Ieowa ap kotin opala wasa dueta amen me mairelar, dueta ol komad amen kin ngisingis ni a kang wain.

⁶⁶A kotin kaloedier a imwintiti kan o kanamenok ir ala kokolata.

⁶⁷A kotin kaselar im en Iosep, o sota piladar kainok en Epraim.

⁶⁸Pwe a kotin piladar kainok en Iuda, dol Sion, me a kotin kupura.

⁶⁹O a kotin kauadar tanpas a im saraui wasa ileile, dueta sappa me pan tengeteng eta kokolata.

⁷⁰Ap kotin piladar sapwilim a ladu Dawid, o a kotin ale i sang nan deun sip akan.

⁷¹A kotin kalua i sang ren sip en kadidi kan, pwen kamanga sapwilim a kainok en Iakop o a soso men Israel.