Psalm 71:5-19

⁵Pwe komui kapore pa i, Maing Ieowa, komui ai kel sang ni ai pulepul.

⁶I liki komui sang ni ai ipwidier, o komui me kaipwi ia sang nan kaped en in ai, i pan kapinga komui kokolata.

⁷Ngai dueta meakot me kapuriamui ong me toto; a komui kel pa i manaman.

⁸Kom kotin kadireki au ai kaping o danke ong komui.

⁹Kom der kotin kase ia la ni ai mala, o der muei sang ia ni ai pan luetala.

¹⁰Pwe ai imwintiti kin palian ia ni ar lokaia, o me kin masamasan ia, kin kapakapung pena,

¹¹O indinda: Kot muei sanger i, komail paki o koledi i, pwe sota sauas pa a.

¹²Maing Kot, kom der kotin doo wei sang ia, Maing Kot! Kom kotin madangdo o sauasa ia.

¹³A me palian ia en namenokala o sarodi; o me rapa kin ia, pwen kame ia la, ren kadupale kidi namenok o lalaue.

¹⁴A i pan auiauita, o i pan kalaudela ai kaping ong komui kokolata.

¹⁵Au ai en kaloki sili omui pung, o omui kamau pan ran karos, me sota kak wadawad pena.

¹⁶I kin weweid sili ni mana en Ieowa Kaun; i pan kapinga omui pung eta.

¹⁷Maing Kot, kom kotin padaki ong ia er sang ni ai pulepul, o i kaloki sili omui manaman akan sang mas kokodo lel met.

¹⁸Maing Kot, kom der kotin muei sang ia ni ai mala, pit en mong ai lao puetepuetala, lao i pan padaki ong seri en seri kan omui wiawia o ong me pan kokodo omui manaman.

¹⁹Maing Kot, omui pung meid ileile, kom kin wiada dodok lapalap. Maing Kot, is me rasong komui?