Psalm 68:19-35

¹⁹Kapinga Ieowa nin ran akan karos; Kot kin kotiki ong kitail katoutou patail, ap pil kotin sauasa kitail. Sela.

²⁰Atail Kot iei sauas patail, o Ieowa Kaun kin kotin dorela sang mela.

²¹Melel, Kot pan kotin kawela mongan a imwintiti kan, o a pan kotin leser pasang takain mongan ir, me dadaurata ar katiwo.

²²Ieowa kotin masanier: I pan kapure dong ir sang nan Pasan, I pan wa ir do sang nan kapin madau;

²³Pwe koe en tiakedi ong nan ntan imwintiti kan, o noum kidi kan en tamotamo.

²⁴Maing Kot, a sansal duen omui kotikot sili, duen omui kotikot sili nan mol omui saraui, ai Kot o ai Nanmarki.

²⁵Pwin en kaul kin tiong, ap pwin en saunkasang nan pung en peinakap akan, me wiadar aip.

²⁶Kapinga Kot Ieowa nan momodisou kan, komail me kisan parer en Israel.

²⁷Peniamin tikitik kin kakaun nan pung ar, saupeidi en Iuda iangaki sapwilim ar akan toto, saupeidi en Sepulon, o saupeidi en Naptali.

²⁸Omail Kot kotin kauadar omail wei; Maing Kot, i me komui en kotin katengetengedi, pwe sapwilim omui dodok.

²⁹Nanmarki kan pan wa dong uk ar kisakis pweki omail im en kaudok nan Ierusalem.

³⁰Kom kotin lipor ong man en nan rau, o pwin kau ol iangaki na kan, o wei kan, me kin pepei pweki kisin moni. Kotin kamueit pasang wek kan, me kin men mauin.

³¹Saupedi en Äkipten pan pwarado; men Moren pan pokadang Kot pa ’rail.

³²Komail wei kan nin sappa kauli ong Kot, kakaul o kapinga Ieowa. Sela.

³³I, me kin kotikot sili nanlang, nanlang en masia! Kilang, a kin kotiki ong sapwilim a nansapwe manaman.

³⁴Komail kamelele mana en Kot! A lingan mi ren Israel, o a mana mi nan tapok kan.

³⁵Kot meid kapuriamui nan mole saraui. I Kot en Israel. A pan kotiki ong aramas akan mana o kelail. Kapinga Kot!