Psalm 48:6-12 in Kosraean

⁶ Elos sangeng ac arulana tuninfongla ingo, Oana sie mutan su akola in isus,

⁷ Ku oana oak palang su musalla ke sie paka lulap.

⁸ Kut lohng tari ke ma God El orala Ac inge kut liye In siti lun God lasr, LEUM GOD Kulana; El ac fah karingin siti sac nwe tok ma pahtpat.

⁹ Ke kut muta in Tempul lom, O God, Kut nunku ke lungse kawil lom.

¹⁰ Mwet uh kaksakin kom in acn nukewa, Ac pungom fahsrelik nu fin faclu nufon. Kom kol mwet uh ke suwoswos.

¹¹ Lela mwet in Zion in enganak! Tuh kom oru nununku suwohs; Lela in oasr engan in siti nukewa in Judah!

¹² Mwet lun God, kowos fahsr rauni acn Zion ac oek tower fulat we;