Psalm 22:3-8 in Kosraean

³ Tusruktu kom muta fin tron lom oana El su Mutal, Su mwet Israel elos kaksakin.

⁴ Mwet matu lasr meet ah elos filiya lulalfongi lalos in kom; Elos lulalfongi kom, ac kom molelosla.

⁵ Elos tuh pang nu sum, ac kom molelosla liki mwe sensen; Ac ke elos lulalfongi kom, elos tiana akmwekinyeyuk.

⁶ A inge nga tia sifilpa mwet se; nga oana wet soko, Mwet nukewa srungayu ac aksruksrukyeyu.

⁷ Elos nukewa su liyeyu elos aksruksrukyeyu; Elos yayaiyu ac isrunyu.

⁸ Elos fahk nu sik, “Kom lungsena lulalfongi LEUM GOD, Efu El ku tia molikomla? Fin pwaye LEUM GOD El lungse kom, Efu ku El tia kasrekom?”