Psalm 119:48-141

⁴⁸I kin pokadang pa i kat omui kusoned akan, me i pok ong, o i pan madamadaua duen omui kusoned akan.

⁴⁹Kotin tamanda sapwilim omui ladu, duen omui masan, me i kin kaporoporeki.

⁵⁰I me kin kamait ia la ni ai luet; omui ianu kan kin kakel ia da.

⁵¹Me aklapalap akan kin mamale kin ia; ari so, i sota kin muei sang omui kapung o.

⁵²Maing Ieowa, ma i lamelame duen omui kusoned akan sang nin tapin sappa, i ap insenemau kila.

⁵³I makar kila me doo sang Kot akan, me kin muei sang sapwilim omui kapung o.

⁵⁴Omui kusoned akan, iei ai kaul en kaping nan ai im en kairu.

⁵⁵Maing Ieowa, ni pong i kin madamadaua duen mar omui, o peiki ong omui kapung.

⁵⁶Mepukat wiaui ong ia er, pweki ai peiki ong omui kusoned akan.

⁵⁷Maing Ieowa, iet pwais ai, en kolekol omui masan kan.

⁵⁸I kin ngidingid ong komui sang nan mongiong i; kom kotin maki ong ia duen omui inau o.

⁵⁹I kin madamadaua duen al ai, ap kainen wong omui kadede kan nä i kat.

⁶⁰I kin nantiong o sota pwapwand kolekol omui kusoned akan.

⁶¹Pwin en me doo sang Kot akan kapil ia pena, ari so, i sota monokela omui kapung kan.

⁶²Ni ailep en pong i kin paurida, pwen danke komui, pweki omui kusoned pung.

⁶³I kin waroki ong ir karos, me masak komui o ir, me apapwali omui kusoned akan.

⁶⁴Maing Ieowa, sappa direki omui kalangan; padaki ong ia omui kusoned akan.

⁶⁵Maing Ieowa, komui me kotin wiai ong sapwilim omui ladu kamau kan duen omui inau o.

⁶⁶Padaki ong ia tiak mau o lolekong, pwe i kin liki omui kusoned akan.

⁶⁷Mon ai aktikitikala, i kin sapusapung, a met i kin apapwali omui masan.

⁶⁸Komui me mau o kapunglol, kotin padaki dong ia sapwilim omui kusoned akan.

⁶⁹Me aklapalap akan kin kalikama ia; a ngai kin apapwali omui kusoned akan sang nan mongiong i.

⁷⁰Mongiong arail masul kila wi; a i kin peren kida omui kapung.

⁷¹Meid mau ong ia omui kaopampap ia la, pwe i en padakki omui kusoned akan.

⁷²Kapung sang nan silang omui mau ong ia, sang kold o silper kid toto.

⁷³Lim omui kan kapik o wia ia dar, padaki ong ia, pwe i en asa omui kusoned akan.

⁷⁴Me kin masak komui, pan kilang ia, ap peren kida, pwe i auiaui omui masan.

⁷⁵Maing Ieowa, i asa, me omui kadeik kan me pung, o kom kotin kaopampap ia la ni omui melel.

⁷⁶Omui mak pan kamait ia la, duen me kom kotin inauki ong sapwilim omui ladu.

⁷⁷Kom kotin kupura ia, i ap pan memaur eta, pwe i kin peren kida omui kapung.

⁷⁸Me aklapalap akan en sarodi, pwe re sapung ong ia ni sokarepa; a ngai madamadaua duen omui kusoned akan.

⁷⁹Me masak komui, ren waroki ong ia, o me asa duen omui kadede kan.

⁸⁰Mongiong i en pung ni omui kusoned akan, pwe i ender sarodi.

⁸¹Ngen i kin inong iong omui dore ia la, i auiaui omui masan.

⁸²Por en mas ai kin anane omui inau, kalelapok: Iad me kom pan kotin kamait ia la?

⁸³Pwe i luetalar rasong deun pil eu nan adiniai, i sota monokela omui kusoned akan.

⁸⁴Arai da, sapwilim omui ladu pan memaurada? Iad me kom pan kotin kadeikada ai imwintiti kan?

⁸⁵Me aklapalap akan weiradang ia por akai, irail me sota kin duki ong sapwilim omui kapung o.

⁸⁶Sapwilim omui kusoned akan karos me melel. Irail raparapa kin ia ni sota karepa; kom kotin sauasa ia!

⁸⁷Me ekis, re pan kame ia la sang nin sappa, a ngai sota muei sang omui kusoned akan.

⁸⁸Kamaur ia da duen omui kalangan, a ngai pan kolekol kadede en silang omui.

⁸⁹Maing Ieowa, omui masan pan potopot eta nanlang.

⁹⁰Omui melel kin sang eu kainok lel eu; komui me kotin kasonedier sappa o a pan mimieta.

⁹¹Irail karos mimieta lao lel ran wet, duen omui kusoned akan, pwe karos kin upa komui.

⁹²Ma omui kapung sota pan kaperen pa i, i pan mela ni ai luet.

⁹³I sota pan monokela omui kusoned akan kokolata, pwe ir me komui kakela kin ia da.

⁹⁴Ngai sapwilim omui, kom kotin sauasa ia! Pwe i inong iong sapwilim omui kusoned akan.

⁹⁵Me doo sang Kot akan masamasan ia, pwen kame ia la; i kin apwali omui kadede kan.

⁹⁶I kilanger imwin meakaros, a sapwilim omui kusoned pan mimieta.

⁹⁷Ia wan ai pok ong sapwilim omui kapung! Nin ran karos i kin kasokasoi due.

⁹⁸Kom kin kalolekong kin ia omui kusoned akan sang ai imwintiti kan, pwe irail pan ieiang ia kokolata.

⁹⁹Ngai lolekong sang ai saunpadak kan karos, pwe i kin madamadaua duen omui kadede kan.

¹⁰⁰Ngai lolekong sang me ma kan, pwe i kin apapwali sapwilim omui kusoned akan.

¹⁰¹I sota mueid ong nä i, en weweid pon al sapung, pwe i en kolekol omui masan.

¹⁰²I sota wuki wei sang omui kusoned akan, pwe kom kotin padaki ong ia er.

¹⁰³Omui masan me iau sang onik nan au ai.

¹⁰⁴Omui kusoned akan kin kalolekong ia, i me i kin tataki al sapung karos.

¹⁰⁵Sapwilim omui masan me ser pan nä i, o kamarain pan al ai.

¹⁰⁶I kaukilar, me i pan kolekol omui kusoned pung kan, o i pan kapwaiada.

¹⁰⁷I insensued melel; Maing Ieowa, re kotin kamaur ia da duen omui inau.

¹⁰⁸Maing Ieowa, kom kotin kupura kisakis en au ai, o kotin padaki ong ia omui kusoned akan.

¹⁰⁹I kin wewa maur i nan pa i kat; i sota monokela omui kapung.

¹¹⁰Me doo sang Kot akan insensare ia, a i sota wuki wei sang omui kusoned akan.

¹¹¹Omui kadede kan iei ai soso soutuk, pwe re kaperenda mongiong i.

¹¹²Mongiong i kin inong iong kapwaiada omui kusoned akan ansau karos kokolata.

¹¹³I kin kailongki me lol riapot, o i kin pok ong omui kapung.

¹¹⁴Komui ai kadauk o pere pa i, i kaporoporeki omui masan.

¹¹⁵Komail me sued akan en muei sang ia! I men apapwali kusoned en ai Kot akan.

¹¹⁶Sauasa ia duen omui inau, i ap pan memaur eta; o kom der kotin mueid ong, i en namenokala ni ai kaporopor.

¹¹⁷Kamanga ia da, i ap pan kelailada, i ap pan apapwali omui kusoned akan ansau karos.

¹¹⁸Kom kin kotin tiakedi karos, me pan wuki wei sang omui kusoned akan; pwe arail sapung me dir en likam.

¹¹⁹Kom kin kotin kase sang sappa me doo sang Kot akan karos dueta samit; i me i kin pok ong ki omui kadede kan.

¹²⁰I kin masak komui, i me i kin muserereki, o i kin masak omui kadeik kan.

¹²¹I kin apapwali me inen o pung; kom der kotin pang ia lang ren me kin wia sued ong ia.

¹²²Sauasa sapwilim omui ladu o kamaitala i; me aklapalap akan ender sued ong ia.

¹²³Por en mas ai inong iong omui kamaur ia, o omui inau pung.

¹²⁴Wia ong sapwilim omui ladu duen omui kalangan, o kotin padaki ong ia omui kusoned akan.

¹²⁵Ngai sapwilim omui ladu; kotin padaki ong ia, pwe i en dedeki sapwilim omui kadede kan.

¹²⁶Ansau leler, me Ieowa pan kotin wiawia; pwe irail kawela sapwilim omui kapung.

¹²⁷I me i kin pok ki ong sapwilim omui kusoned akan, sang kold o kold lingan.

¹²⁸I me i kin kasampwaleki sapwilim omui kusoned akan karos, i tata ki al en likam karos.

¹²⁹Omui kadede kan meid kapuriamui, i me mongiong, i apapwali kin ir.

¹³⁰Ma omui masan pan sansalada, a pan kareda peren o lolekong ong me opampap akan.

¹³¹Au ai kin sar pasang o inong iong sapwilim omui kusoned akan; pwe i kin anane ir.

¹³²Kom kotin wukedoke dong ia, o maki ong ia, duen me kom kin wiai ong ir, me pok ong mar omui.

¹³³Kotin kainenela al ai nan sapwilim omui masan, o der mueid ong, me sued kot en wiawia ia.

¹³⁴Kotin dore ia la sang mor sued en aramas akan, a i ap pan kolekol omui kusoned akan.

¹³⁵Kotin kamarainiki omui ladu silang omui, o kotin padaki ong ia duen omui kusoned akan.

¹³⁶Por en mas ai me dir en pil, pweki ar sota peiki ong omui kapung.

¹³⁷Maing Ieowa, komui me kotin pung, o omui kusoned akan me pung.

¹³⁸Komui me kotiki ong kit er kadede pan omui pung o melel, pwe i en nantiong kapwaiada.

¹³⁹I insensued melel, koren iong mela, pweki ai imwintiti kan monokela omui masan akan.

¹⁴⁰Omui masan meid makelekel, o sapwilim omui ladu kin pok ong.

¹⁴¹Ngai me tikitik o me mal amen, a i sota kin monokela omui kusoned akan.