Proverbs 8:12-25

¹²“Ani Ikia Sinar; ani tutera ningo mu ilak bagasam; ikia ningo se sinar la bagara mu aninga ningi aniso.

¹³Kariimet Yawe bowa ningi bagasan, mu nuna ikia memek suen la mesan ale nubiring tusan; ani nusupuling lagara ko munan se nunumi patawura ko munan mu mesam; ale kilek memek betera se den kawel bala mu ani mesam tala.

¹⁴Sangam den se kiti guruga ko den yawara mu aninga ningi aniso, se ikia yumura ko nunguning, se sokel agotala.

¹⁵King alo se ali sor supuling alo mu ani te nunga ali terong la bitarsan, ale munan ningo diram la kalosan;

¹⁶kari bibiya nunup ago mu ani te ali imi terong la bitarsan.

¹⁷“Kariimet aninga kuesan, mu ani betela nunga kuesam; ale aninga kupusan, mu ani agarkasan.

¹⁸Kariimet ani te mel suen biya gemasan ale nunup biya kaposo; ale ani te daiga bagara ningo diram te dagi baga lagasan.

¹⁹Aninga ningo kariimet nungarsam mu gold se silver ningo kia saparam.

²⁰Ani munan ningo diram la te laga se,

²¹kariimet aga kuesan mu mel ningo ningo nungarsam se karogo terong masan.

²²“Ani Yawe ko, se tom nu taiti ali mel suen la me nungurukaso la, ani noko ningi bagakasam.

²³Nu kumik duap se kopa mena iwitatala, ani noko ningi angimik duap se kopa mena bagerem se mel suen biya udagi aratam.

²⁴Gagi se yu me arata tom te,

²⁵duruk bibiya se motongar gotektek kuwim me ta ta la,