Proverbs 6:1-24

¹Aga namar, kari bo ni ninguru me ko ikia, bare bo kote dinau beteram, se ni balem kari mu sangaru ale ko dinau koma kutuwurko balem,

²mu ni keta nimi nu kuting te talipara ningi beterem.

³Aga namar, ni paguwurem ale uwuta beterem agi mu, ani balsam imi karo tui ale iwita bitarko: am tairatela kari ni sangaruko balem umu kote namar ale, kua kapa se, isaru se, den ni ilak kalem mu kutuwurok ale menawurokko.

⁴Ni anir ale ukirok se bares kote namarko me kimi bitarko, mena.

⁵Buruk diwang dagarok gulia saposo ale naguso iwita, kote pasak ala namar ale nimi gulia toko.

⁶Ni gagor kari, madidir kiwem betesan owore arik ale ka ikia sinar arukko!

⁷Nuna kariimet bo guguna me nungarso,

⁸bare nuna amaruya inang mena ko tom mu nuna ikisan, ale inang bolala awu gilingisan.

⁹Ni tuawun kari, ni amaru te anira geraga sowore bitarko? Kua anira sowore amaru bitar ale baresko?

¹⁰Ni motam kilikilok ma katir la, aking anira katir la, kiting patutumura ale nimi ira barutuwura katir la ko munan umu te,

¹¹ni kari kimik mel mena lagerko, tere kari ka melmasak gi karogo nama sapara iwita lagerko.

¹²Kari memek mu den kawel munaka munaka geragoso.

¹³Nu den kawel nika manaru se mu, nu ko bo motam kui te agi kuting te ira ituwokko.

¹⁴Noko gomang motam ningi mu ikia memek bitirukko iki guruguwoso; nu apareyate namoso mu ikup arataso.

¹⁵Buta se nu tairate ikup memek arigokko, se lage bo aking te ningo arigokko mu mena.

¹⁶Munan 6 agi 7 imi se saki saki karogo, imitang Yawe me ko kueso nunguningkiri:

¹⁷nanimi patawura ko munan, den kawel bala ko munan, kari mora se kuera ko munan,

¹⁸ikia memek iki gurugu lagara ko munan, guyak la memek betera ko nagu namara ko munan,

¹⁹den kawel te bo atumu saonga ko munan, launuria bagara suanta nunga kula se nunumi nongomang maguwura ko munan; munan imitang se saki saki karogo imitang Yawe me ko kueso nunguningkiri.

²⁰Aga namar, ni ka niet ko den ilukuawur ale niam ko kausa den agotala karo tuiko.

²¹Nononga den umu gemang motam ningi bitar ale bala yawara iwita degetak tugum se pempem anirukko.

²²Nika bagara aolak te ka kiti gurugokko, ka anira te ka sinar taukko, se aniwa bares mu kerak munakarukko.

²³Mu awuk, nononga den mu nika galep iwita, se nunga kausa mu nikinang kisok ale ka bagara aolak te ka memek ka kausok ale ningo ko lage te ka bitirukko.

²⁴Nononga den mu ka sanguk se bo ko imet ko kawel te me dagulko, ale lage luan imet ko den welang me ikiko.