Proverbs 3:7-16

⁷Keta nimi ikia sinar ago ma me baluko; munan memek biring tui ale Yawe kuring bowa ningi la bagerko.

⁸Se munan umu ka kimik lilim ko ikes menawurok ale kimik sokel tuokko.

⁹Yawe manga mel ningo ningo kisam mu te nup biya tui se, ka inang ningo sang gi ale ago tuiko.

¹⁰Munan umu te ka na inang te bolala awura ko kuwim mu na inang karogo terong mauk, se ka waen mu biya tala kuring aratuk ale kaparukko.

¹¹Aga namar, Yawe ni te giris meko kiwem bo bu iwita kisok, agi den aora bo ka manuk, mu me ko gemang dagulok se biring tuiko, am iki karo tuiko,

¹²mu awuk, Yawe ko kariimet nunga kueso mu bu nungarso, kari namar ko kua nanuguso ale nukum tagiso iwita.

¹³Kari awiriya ikia sinar kupuso ale arigiso, ale ko nunguning ko ari ikiso, mu amilmilarukko.

¹⁴Mu awuk, ikia sinar mu silver se gold kiaram, se ko manga motam mu kalel biya.

¹⁵Ikia sinar mu manga diamond nunga diara koma mu am kia saparam; se anapeya mel ni ninguru ko kua lagasam mu ikia sinar mu nunga kia saparam tala.

¹⁶Marak tom maiya biya bagara mu noko kuting sengam te aniso, se nup biya se mel ningo ningo ago bagara ko munan mu noko kuting ngas mu te aniso.