Proverbs 25:6-28

⁶King koma te keta nimi nip me patawur ale ka sail te noko kari bibiya nunga kulupik ningi kuwim bo toko me karogo kaerko.

⁷Nu kota nika manuk, “Iwita tai basuko mauk mu asele ko; bare ni noko dom bibiya nongoma te nu aliti biya ka bitiruk mu dolara ago. Anapeya motam te arigem mu kawel agi wore ko,

⁸gemang gemang pasak ala biguwura te me bitarko, mu awuk, den kotam umu den te ka kiaruk ale dolara kisok, mu ni awuk bitarko?

⁹Iki paguwura kari bo kote betera mu, kote namar ale wete yumura la balu aruruwuralko; ni noko dugu duap kariimet ningi me balu pagaruko.

¹⁰Kariimet ka bo wetang saperem mu ko dolara kisimon se ka nip mu magara biya magarukko.

¹¹Kari munak iki kuawuwa ko tom te diram bala mu, kariimet sangam yawara se lila yawara nungarso.

¹²Ikia sinar kari awiriya due iluso se nu iki karo tuso, mu kulolo yawara bo gold te nungurman wore dogotak tugumam iwita.

¹³Worem biya ningi inang gi laga, degetak garagara ma se yu ipi nana ale gemang kua kapara iwita, dom kari biya mu ko taling kari kumik gagor mena, diram la bita saposo, mu ko gomang motam kua kaposo.

¹⁴Awiriya ko mel ningo ningo ko numi patawuso, ale ko mel sang saki alo nungaruk maso bare me nungarso, mu nu taiti nuwi marir karogo taiso bare tuwik me kaposo wore toroman.

¹⁵Gemang kua kapa se welang karogo munakara ko munan te mu, kari supuling gomang gurugokko me terong ta wore, gomang motam am gurugokko.

¹⁶Honey arik agi mu, ko iki se noko; tawun biya no mu kapirko.

¹⁷Uwutatala, tom sapa sapa ka bo ko kawam te namar mu terong; bare am taira tairate nama taiwer mu ko ko gagorarukko.

¹⁸Bo ko kumik ko den kawel bala ko munan mu, kager ko saenang agi baenat agi gatu kore buguyam te daongasan owore toroman.

¹⁹Kari kore yaman ago na no turutuwu lagoso, agi kari suwik lot ago se sanamara aolak ko me terong, uwutatala, diram la me betera ko kari mu ikup kam ningi te ira sanamir, bare ka sangaru turutuwurokko.

²⁰Bo gomang ikup karogo bagara se koma te amilmil wur iluwa mu me terong; mu ko ikia, kari bo marir birigira ningi iluwa ale ko kumik guang kutuwu sapara agi, gagi iluwa ale yu welang ningi waru kam, yaman tuso.

²¹Kari kerak memek ta wore na ko kueruk mu inang tui se naukko, ale yu ko kueruk mu yu tui se naukko.

²²Uwuta mu, ni tama kaok kaniwara mu nu supuling te awukam yaman tauk ale munan ni kimik te beteram mu ko dolorukko; se Yawe ko koma ningo mu kisokko.

²³Saki alo nubiring ko balu balu geraga ko munan mu kariimet nongomang motam maguwuso se nongoma motam yar daula samamer tuwik karogo tai kam karkamonko.

²⁴Nika imet ining singi bitiruk mu ilak kawam ningi bager i? Mena. Aratu ale matangi siwik motam atumu bager mu terong!

²⁵Yu ko degetak garagara maso se yu nasam ale amilmilasam uwutatala, mel bo ko loaga ikia bita lagasam se ko den ningo tai laga tai arataso se ikisam, mu ni amilmilasam.

²⁶Kari ningo diram mu munan ningo bita taso ale kari memek karo tuso mu ko ariga, yu yawara wore lom gege tuguma wore iwita.

²⁷Honey ko dera binga se tawun biya nana mu kapi lagerko; uwutatala, nip biya ta ko dera binga se karogo kaeya lagara mu dagulu paraserko.

²⁸Awiriya kota ko kiwem ninguru me bitarso, mu nu ningam bo inang ago lilim aniram se ko kar parasaram kaparam iwita bagoso.