Proverbs 24:6-20

⁶Buta se kager ko namar ale marirerko mu, ni kiti guruga ko den se den sangam kari sinar nongote gi ale asele kager ko namarko.

⁷Kari ngualara mu ikia sinar taukko ikup biya; buta se kariimet biguwura biya ningi den bo ta me balukko.

⁸Ikia memek balu nunga ko kari mu nup betemon ikup memek ko kari supuling mamonko.

⁹Ikia memek kari supuling aora biya mu balu nungurso mu memek; se kariimet mu awiriya ikia sinar ko den ko doleng saposo mu ninguru biriruwusan.

¹⁰Ni ikup kam ningi durdur lager, mu ni kituwura se sokel mena!

¹¹Kariimet nungumik den mena nunga momon se kuemonko nongorak namawomon mu, nunga bataguru to ale nunga ilup se me nunga momon se kuemonko.

¹²Bare ni balu, “Arikko, ana mel umu me ko ikiman,” ma balu, bare Kaem kariimet gomang motam tuati ikiwara mu ka kawel mu me ikiok i? Nu nika bitaruwara mu am kuluru i? Se nu kariimet suen la nunga munan betesan mu koma diram la me nungaruk i?

¹³Aga namar, ni honey sang noko; mu mel ningo, ni kamili te kau to mu yaman nuam ko ikiko.

¹⁴Uwutatala, ikia sinar mu gemang motam ningi bitar mu yaman nuam; ni to ale ilup mu, maingte ko ningo ari se lager se uwutata ka sangaru se lagarukko.

¹⁵Kari memek bo kari ningo diram bo memek tuokko, ko kawam duap te yumuwoso uwuta me bitar, ale ko kawam digo lilim me maguwurko.

¹⁶Mu awuk, kari ningo diram mu tom 7 ko ta dagulok bare am barasuwurukko, bare kari memek ikup te daguloso mu dagula biya daguloso.

¹⁷Kari ni kerak bitawara mu dagulok mu ni me gusir agi, suwik motam atumok ale taguruk mu ni me amilmilerko.

¹⁸Ni uwuta bitar mu Yawe ni kerak me amilmilaruk, ale noko gomang memek kari mu kumik te mu kutuwu saparukko.

¹⁹Ni kariimet memek mu ningo la bagasan mu ko me gemang dagulokko, ale nunga mel ningo ningo karogo bagasan mu ko me ikia ka morukko,

²⁰mu awuk, kari memek mu nunga bagara aolak bo maiya biya mena, se nunga galep mu tairate la iri palagukko.