Proverbs 20:5-21

⁵Kari ko ikia yumura sang mu gagi du biya iwita, bare kari sinar mu asele karogo kaeyawa ko ikiokko.

⁶Kariimet suen biya balsan, “Ikup arigal mu aningate tairalko. Ani ninga saonga ikisam,” masan; bare kariimet nunguningta ka sangarmonko mu suen mena.

⁷Kari ningo diram la, mu ko bagara aolak ningo diram la; noko kuriang gue mu yawarakala la bagamonko.

⁸Tom king ko daiga kuwim te ikup guyak tuterukko dagiso, mu nu memek mu pasak ko motam sinarso.

⁹Awiri baluk, “Aninga angamang motam ko ninguru sinar taem, ale ningo la, memek bo me beterem,” maukko?

¹⁰Skel te ikup guyak diram la me tata, agi mel ko maiya tukunang diram la me ilu ariga ko munan, mu Yawe biriruwuso nunguningkiri.

¹¹Kuriang ko gomang motam ningi ningo se diram la agi mu ko ikiko mu, ko munan te arikko.

¹²Nadogowa te den ikinakko, se namotam te sor ariginakko, Yawe ilagala la bita nangaram.

¹³Ni anira ko kua lager, mu ni kari kituwura ko aratuko; loaga se ura iluwer, mu ni inang suen biya karogo bagerko.

¹⁴“Diara tom sumu kalel biya!” ma lagaram, se mel kotam diara tom kutuwuram se kaparam, se diara kari mu koma aliti te diaram, ale namaram munan mu ko numi patawukaso.

¹⁵Gold mu gold, se diamond mel mu diamond mel; bare kari kuring ningi ikia ningo ko den arataso mu, ali imi ko mel ningo nunguningkiri mu kiaram.

¹⁶Kari bo ni ninguru me ko ikia agi mu, nika manga mel agi mu yam ngual me tuiko; ni gir ale noko guang ningo bo to ilup asele mel ko balso mu tuiko; se nu ko guang mu ko negeruk ale pasak tairuk ko ikup kutuwurokko.

¹⁷Kawel kilek te inang gia mu yaman nuam, bare ninguru iki, mu ni saun sakar kiring tuguman se nowasam iwita.

¹⁸Ikia sangam awote ikia kaloko; kiti guruga den to ale asele kager ko namarko.

¹⁹Munak gi ago geraga ko munan te den yumura pagorsan; buta se munak ko kari ilak me sorerko.

²⁰Awiriya nuamnuet kua namamonko nunga manuk, mu nu galep bo sor tiromorom biya kaniwa iri palagoso iwita.

²¹Lage guyak te mel ko tom aitak bare sail te gia, mu kerak tom maiya biya me anirukko.