Proverbs 17:8-17

⁸Manga mel kari tua ale diruwura se mel ningo tere gi karogo tai kisa ko munan mu, kari sika nunga mel ningo, te to no laga gilingisan.

⁹Awiriya bo ko memek siwu saposo, mu nu nanimi ko kuera ko munan sokel tuso; bare awiriya bo ko memek umu balu balu geragoso, mu nu tiran ningo nunga parusuwuso.

¹⁰Kari ikia ningo ago mu ko memek tom suanta ko manaru, mu nu pasak ala ari ko ikiokko; bare kari supuling lagara karogo mu tom 100 iwita moa maguwur, bare am me ta ikiokko!

¹¹Kari memek mu supuling lagara se dun kopa iluwa ko kiwem mu ko kua lagoso; bare kari bo wuli karogo mu betemon se namaruk ale ikup yaman tuokko.

¹²Bear nuam ko gotek tere namon se gomang magawuruk mu koma te aratuko mu, sinar toko; bare kari ko ikia munan memek nunguningkiri mu memek bitawuruk se koma te aratuko mu, eng am ninguru ko sinar toko! Umu asele memek ko memek arikko!

¹³Awiriya munan ningo mu ko koma munan memek bitiruk, mu memek mu ko kawam digo lilim me ta bita taukko.

¹⁴Kari bo ilak tagira gurungumura ko munan me duap bitarko: duap betera mu kausik daong ko mayang kutuwu kam; se ka gemang memek mu am ira se kaparuk se memek biya bo me aratukko.

¹⁵Kari kumik den mena, yam ipi ikup te betera ko munan, se kari ikup karogo, bare am betera se amilmil te namara ko munan, mu ilagala la Yawe am biriruwuso nunguningkiri.

¹⁶Anape ko kari supulingkiri mena mu ikia ningo te diarukko manga kuting te bitarko? Mu me terong, mu awuk, nu ikia sinar taukko gomang me aniso.

¹⁷Tiran yawara mu pempem ka kua lagarukko; se ka launuria mu ka ikup dun sika giokko bagoso.