Proverbs 16:8-29

⁸Manga mel suen biya ago baga se, kiwem memek betera mu me terong; bare manga mel katirta karogo baga se, munan ningo diram la karo tua umutang mel biya.

⁹Kari ko bagara aolak te anapeya bitirukko agi aguwaya bitirukko, ale amaruya bitirukko mu ko ikia nungurso, bare Yawe aing au mauk mu asele uwutata aratukko.

¹⁰King den balso mu sokel ago se aora biya; owore te se nu sinar la se diram la kariimet nunga bituokko.

¹¹Mel ko ikup guyak se ko maiya tukunang am diram la tata ko munan mu Yawe ko munan; nu munan diram la beteso.

¹²King alo munan memek mu am me ko kuesan nunguningkiri, mu awuk, king ko ura mu munan ningo diram te sokel ago la aniso.

¹³King alo kariimet den diram se den nunguning la balsan mu nunga amilmilasan.

¹⁴King gomang magaruk mu, kuera mateng am aratukko tala; buta se ikia sinar kari mu tairate king gomang motam lila tuokko karogo kaerukko.

¹⁵Tom king ko koma motam gusira amilmil ago arik, mu bagara ningo ko tom iwita ikiko; noko gomang amilmil mu worem aora biya ningi yu bugulik ka kautokoyam.

¹⁶Ni ikia sinar toko mu yawarakala, mu gold kiaram; uwutatala, ni ikia ningo tuterko mu yawarakala, mu silver kiaram!

¹⁷Kariimet diram nunga lage biya mu munan memek me te aniso; awiriya ko munan ko sinar taso, mu yawarakala bagarukko.

¹⁸Nanimi patawura ko munan buring ko mu, magara kuenera ko munan taiso; kualala namara ko munan buring ko mu, dagulu parasa namara ko munan taiso.

¹⁹Kua kapara ale kariimet kituwura nongorak bagara ko munan mu, munan yawara; bare nunumi patawura alo nunga sail te kariimet saki nunga melmasak gia mu nongorak nimi tui nana ko munan mu memek.

²⁰Awiriya kiti guruga ko den iki karo tuso, mu daiga bagara yawara arigiso; uwutatala, awiriya Yawe te ira sanami lagoso, mu amilmilarukko.

²¹Kari ikia sinar ago, mu balsan sinar kari masan; se den welang ningo mu kausa ningo sokel tuso, se kariimet karo tusan.

²²Awiriya ikia sinar ago, mu ko ikia sinar mu marak ningo ko yu iwita nu sangaru lagoso; bare nusupuling lagara alo mu nunga munan memek mu te, memek tagi nongota nungumik te betesan.

²³Kari ikia sinar ago mu, kuring te ikia sinar ko den arataso; se kariimet ko den ikimon ale karo tumonko kuesan.

²⁴Den welang ningo mu honey iwita, kamili te yaman nuam, se kimik lilim sokel tuokko.

²⁵Kari bo ikiso lage nu karowoso mu diram iwita ikiso; bare karo nama nukum te mu, kuera mateng arigiso.

²⁶Inang ko kuera ko munan mu kari ura te diruwuso; noko na ko kuera eng am bo karogo ura te diruwuso.

²⁷Kari memek mu munan memek bitirukko ikia nungurso burangoso; noko munak mu tama kuamili buluwuluk makam.

²⁸Kari memek kawel kuruwim mu ikup duap duap tagiso; bo buring ko bala mu, tiran ningo nunga parusuwuso.

²⁹Daong kager ko kari mu ko bo gomang kulukurso ale ilak kager daong memek ko lage te namoso.