Proverbs 10:4-24

⁴Gagor ko munan te kimik mel mena lagerko; bare ura kowar ko munan te mu mel ago lagerko.

⁵Kari sinar mu inang gia kam te na inang gi bolala awuso; bare awiriya na inang gia kam te ani geraga lagoso mu kota numi dolara tuso.

⁶Kariimet munan diram karo lagasan, mu marak ningo tuwik musiring kapakoyam nungumik kuali kaposo; bare kariimet memek nuguring te mu kager ko den aratu lagoso.

⁷Kariimet ningo diram mu kuesan mu nunga munan ningo mu mel yawara bo iwita ani lagoso; bare kariimet memek alo kuesan mu nunga nunup mena namoso.

⁸Kariimet ikia sinar ago, mu amilmil te iki karo tusan; bare awiriya munak ngualara kuring te aratu lagoso mu maga namoso.

⁹Kari ko ikia, ko gomang motam se aolak ko sinar to lagoso, mu sokel ago la lagoso; bare awiriya ikia memek karo lagoso, mu me yumuso.

¹⁰Awiriya memek ereso ale te kaluwurokko motam kui parang maso, mu ikup tagiso; bare kari mel memek wetang saposo, mu bagara ningo lila sokel tuso.

¹¹Kariimet ningo diram mu ko kuring mu tam bo marak nangarso wore turan; bare kariimet memek nuguring te mu, kager ko den aratu lagoso.

¹²Nanimi ko me kuera ko munan mu ikup duap duap tagiso; bare nanimi ko kuera ko munan mu memek suen la ko sokel karogo kaposo.

¹³Kariimet sinar mu nuguring te ikia sinar ko den arataso; bare awiriya sinar mena mu bu taukko.

¹⁴Kari ikia sinar ago, mu ikia ningo ningo ilu biguwuso; bare awiriya sinar mena mu munak te ikup tagiso.

¹⁵Kari kumik mel ago mu ko mel ningo ningo mu nu bituokko; bare kari kumik mel mena mu awuk saonga taukko?

¹⁶Kari ningo diram, ko bagara aolak ningo mu ko koma, bagara ningo arigiso; bare kari memek, ko kilek memek mu ko koma, ikup memek arigiso.

¹⁷Awiriya ko memek ko kausa den ningo ilukuawuso, mu bagara ningo ko lage arigiso; bare awiriya ko memek ko kausa den buring tuso, mu lage memek karoso.

¹⁸Awiriya gomang ningi la bo ko me kueso bare kuring guang te den ningo ilak balso, mu kawel kari; se awiriya saki alo nubiring ko balu balu geragoso, mu nu kari borara.

¹⁹Munak tawun biya bala ningi mu memek arataso; bare awiriya ko munak ko sinar taso, mu nu sinar kari.

²⁰Kari ningo diram ko munak mu silver ningo iwita; bare kari memek ko gomang motam mu ningi mel ningo bo me aniso.

²¹Kari ningo diram ko den mu inang ningo iwita, kariimet suen biya nunga sangarso; bare kari supuling aora biya mu kumik ikia ningo bo mena se kua namoso.

²²Yawe ko marak mu yawarakala se mel ningo ningo nangarso; se memek bo ningi nanga maguwurokko me aniso, mena.

²³Kari ngualara mu memek bitirukko mu amilmil te la beteso; bare kari sinar mu ikia sinar ko munan bitirukko ninguru amilmiloso.

²⁴Kari memek mu mel memek nu me ko kueso ale nguangawoso mu tairuk maguwurokko; bare kari ningo diram mu mel ningo gomang motam te aniso mu taukko.