12 Mago'a vahe'mo'zama antahi'zana kumitia omne'ne nehazanagi, Anumzamofo avurera agrua osu'naze.
13 Mago'a vahe'mo'za knare hu'none huza zamavufga ra nehu'za, mago'a vahe'mokizmia zmage fenkami netraze.
14 Mago'a vahe'mokizmi zamavemo'a, vahe'ma zamahe bainati kazinkna higeno, tuke zmavemo'a kazinkna huno asaneneankino zamunte omane vahe ene, mago'a zanku'ma upama hu'nesnaza vahera, ama mopafintira zamasga huvazigahaze.
15 Kukufamo'a taremofatre znante'ne. Zanagi'a, Namio, Namioke! Zmavesizama eriknarema nosia zana 3'a za me'ne. Zmamuma nosia zana 4'a za me'neankino,
16 e'i anazantamina, fri vahe kumaki, venema mase a'mo'ma mofavrema nontea naravo aki, tima anihuma nehia hagege mopagi, ke'onke zama tefananema nehia tevemofonena zamura nosie.
17 Nefama negeno azanava kema hunenteno, nererama kefenkami atresnia vahe'mofo avurga, kotkoti nama zgamo'za ana avurga ani kasonepesageno, tumpa namamo'za avufga nevgaregahaze.
18 Nagritera 3'a zamo ruzahukna zana megeno, antahi ama'ma nosua zana 4'a zana me'ne.
19 E'i anazana ina kante tumpamo'a monafina hareno nevie, ina kante osifavemo'a have agofetura regraroheno vanoa nehie. Ina kante ventemo'a, tusi'a hagerimpina vano nehie. Hagi na'a hu'nea zanku venenemo'za, vene omase akura zamavenesie.
20 Savri a'mofo avu'avamo'a amanahu hu'ne, venema maseteno'a, ne'za neteno agiteti eri ho'mu hiankna nehuno, kefo zana osu'noe nehie.
21 3'a zamo ama mopamofona azeri tore nehanigeno, 4'a zamo rga oregosie.
22 E'i kazokzo eri'za ne'mo'ma kini mani'zane, neginagi antahizane vahe'mo'za nezama nezamuma hu'zane,
23 ave'sinontaza a'mo'ma ve'ma eri'zane, kazokzo eri'za a'mo'ma kva'ama maninesia a'mofo ve'ama rehanareno manizamo'a, ama mopa azeri tore nehie.
24 Ama'na mopafina 4'a onensa zgaramina mani'nazanagi, knare antintahimo'a, zamagripina avitene.
25 Kipzuvemofona hanave zmimo'a osi hu'neanagi, ko knafima nesagura ne'zana zgegnafi eritru nehaze.
26 Krofamofona hanavezmia omne'neanagi, havefi nozmia negize.
27 Kenumofona kini vahe'zamia omni'neanagi, sondia vahe'mo'zama hazaza hu'za, vugota huza nevazageno, ana amage amage hu'za nevaze.
28 Tagovira kazanteti amne fru hunka azeriga zgamo'agi, kini vahe'mokizmi marerisa nompina ufregahaze.
29 3'a zgamo'za knare huza kana nevazagena kenasane nehuanagi, 4'a zgamoza fatgo hu'za nevazagena negoe.
30 E'i ana zga laionigino mika zgamofona hanave'amo'a zmagatere'neankino, mago zgagura korora huno manigane ozamantegahie.
31 Ve kokoremoza zmahihiza eri antesga hu'za vazageno, ve memeki afumo'za zmasenia eri antesga hu'za vazankna huno, kini ne'mo'ma sondia vahe'anema nevuno'a, ana nehie.
