Pris Sę Ebo Bomai Po 8:18-26

¹⁸Nosali Mosesgo te sipsip kibu omai si elaluali te me deli agai sela asali. Te isigo tigidali dela silabo ofa yabo sipsip dao. Tialima, Aron aga ogwa dabe daligo te sipsip toboluba nogo muai dao.

¹⁹Tama nosali Mosesgo te sipsip ela munama, te sipsip kaneme selama te alta pedai me si me si badu sąsągą bilai dao.

²⁰Agai te kaneme sąsągą bila silibo si da, teda agai te sipsip kibu sikilama, te haliga bono dabe me, te kibu sipsip sągą si me ąį telawali. Te nosali agai te kibu tobolu me ili me te sipsip kibu delage tigidali selama, te altaba munama, te tigidali siaba ulama, te keli naga elalueibao. Agai te Genuai Bidigo po wali gilama yali. Te siago tigidali dabo ofa ebo sipsip te sipsip ofa ebaso, te Genuai Bidigo te denami odama, te bugai haliga eyu yai dao.

²²Tialima, Mosesgo gasa kibu sipsip omai sela asali, te bidi pris sę emainogo dąį eliyu ofa ebo sipsip. Te Aron aga ogwa dabe dali augwaligo te sipsip toboluba nogo muai.

²³Tama nosali Mosesgo te kibu sipsip elama, te dwasianu kaneme selama, te Arongo dolo olo aiyaba muani, te dolo nogode te a wabo nogo danide, me te dolo sągągo te a wabo sągą danide pilibadi yai dao.

²⁴Nosali agai te Arongo ogwa dabe sela aselama, te dwasianu kaneme te augwaligo dolo olo badu aiyaba muani, me te dolo nogo te a wabo nogo danide mubadi, te dolo sągą te a wali sągą danide muyu yali. Tama agai te me badu elaluali kaneme selama, te alta bogo me si me si badu sąsągą bilai dao.

²⁵Nosali agai te kibu sipsip ili salio. Agai te nisa pai kibu danu me sali, te haligade bealubo kibu ili delegabe sobadi, te polalubo dini homu wiegi yai sobadi, te si wabo te kibu homugo si siyu te ili dali sali, te sipsipgo dolo sągą me sai dao.

²⁶Nosali Moses te yis meni yai bret pągąnalubo basket te augwaligo Genuai Bidiba mabo bret munalubo madi pelama, tama agai augwaligo te yis dali ulisąwai bret sali, te augwa plauago nigai bret me deli te oliv wel dali begelali, me te bisket me deli sobadi yali. Tama agai te nai dabe te kibu ili me kibu dolo sągą te nai si daiba muai.