Pris Sę Ebo Bomai Po 7:21-33

²¹“Te Godigo gedude wiegi yai me isąwani naiba nogo diąwani bidi, tagalao, agai te wiegi yai isąwai meda yai naiba nogo diąwani, ma te bidigo tigide pedalubo naiba diąwai baso, ma te wego tigide pedalubo naiba nogo diąnama, tama nosali agai te ofa yali kibu mi tubaso da, teda aga te Genuai Bidigo we bidi hani tomode me bidigobeo,” po wai dao.

²²Genuai Bidigo Mosesbolo walama,

²³te po te Israel we bidi dabeba mao wai. Genuai Bidigo e tiwai po wali, “Dagego te kibu bulmakau me sipsip meme ili me tugio,” po wai dao.

²⁴“Te bulmakau me deli aga digi odolali isaibaso, te ili dagego me tugio. Te me bulu uni hasago te kau kibu ela mueibaso me, dagego kau kibu ili me tugio. Tialima, dagego te kibu ili selama, gasa sę yao. Te usu dao.

²⁵Te augwaligo Genuai Bidiba ofa ebo kau kibu ili te bidi me deligo tubaso da, teda aga te Genuai Bidigo we bidi hani tomode me bidigobe dao,” wali.

²⁶“Dage Israel, dage te mena bulu pedaide bidibo we bidi, dagego munu me te kibu hasa me ba dabe te kaneme dali me tulamu dao. Te kolesaga ebo habu mu selibao.

²⁷Bidigo ma wego te dąų wali bomai po bolobaso da, teda aga te Genuai Bidigo hani tomode munu me bidigobeo,” wali.

²⁸Te Genuai Bidigo Mosesbolo waliyu,

²⁹te Israel we bidiba te po momainogo yali. Agai te tiwai po wai, “Bidigo te deli haliga pedelabo ofa sela aselama, agai te kibu pedai te Genuai Bidiba dolo dąį ilao, te aga ofa te dao,” wai dao.

³⁰“Te bidi aga digi te Genuai Bidiba ofa yabo nai kibu sesemainao. Te Genuai Bidiba maiabo kibu pedai dage e tiwai sesao, te kibu ili me kibu baugo mi tama dao. Tama te bidigo Genuai Bidiba ofa e tiwai ilao. Agai te kibu bau mi te nogo tolaluyu, te Genuai Bidigo gedude iba oba hogabo sę yao.

³¹Tama nosali prisgo te alta siade te kibu ili ulao, tialima te pris augwa te kibu bau sao, te augwa tuabo nai dao.

³²Te kibugo dolo sągą dagego prisba mao, te olo dali maiabo nai dao. Te pedai badu te deli haliga pedelabo ofa eyu,

³³te prisgo te kibu kaneme me ili tego ofa ebo dao. Tama te ebo pris bidigo te dolo sągą somainao.