Pris Sę Ebo Bomai Po 25:22-32

²²Te 8 wabo kibu bede dagego bulubo nai da, te kibu be a naga me delide sali nai tudubadi geaibao. Te dage nai usu elalubadi, te gesi tamadi bulali nai sabo bodoluba usu naibao,” te po wai dao.

²³Genuai Bidigo te tiwai po ma wali, “Te gasa bidigo dagego tǫ abelai baso, agai sesemane sogo mu tonaludugio. Magi baso meni, te duga tǫ mu elalubeo. Te ena Genuai Bidigo tǫ elalubao, te eno dage Israel bidimainogo yali, te bidi dabego augwa tǫde te gasa tǫ kantri bidi dabe osogo bida wabo tiwai yai dao,” wali.

²⁴“Te dage bidi me deligo te duga bage gasa bidigo tǫ abelebaso da, teda agai te tiwai bugagia kone palao, te nosali tǫ aga ayago ma abelemainogo ebaso da, teda aga abelemainao.

²⁵Te duga abagi me deli magi nai doado bage meni baso, te agai mone meba sabo homu elama, te gasa bidigo aga tǫ abelemainogo ebaso da, teda aga deli kanemego dolo tonalubo sę eyu aga tau sabo sę yao, agai te tǫ ma abelama te agaba ma mao.

²⁶Tialima, te aga tau sabo deli kaneme meni yai baso, aga digi ma abelemainao. Te nosali aga mone hauwa elalubaso da, teda aga te tǫ ma abelao.

²⁷Agai nedali te nisu naga kibu be elalubaso, te nai dabe ma wei mabo kibu be gegabo sogo, te kibu be dabede agai nisu naga nai pedelabo te nedao. Tama agai te nai usu nabo mone usu selama, te aga tǫ polobadu abelali bidibolo mao, tama aga tǫ ma sabo usu dao.

²⁸Tialima, te aga mone sǫą pelama, tama aga te tǫ ma abelabo usu meni yai baso da, teda te tǫ abelali bidi aga nogode elalubadi, te nai dabe page bidiba ma mabo sogoba ma usu numainao. Te kibu beba pedalubo sogo, te tǫ abelali bidigo te tǫ aga page bidiba ma dolo mabo usu dao,” wali.

²⁹“Te taun obo tomode elalubo bidigo be, te bidi me deligo abelai baso da, teda te be aga ayago te kibu be deli bididubadi, te be page bidigo ma abelabo usu dao.

³⁰Te kibu be deli bidai digi agai te be ma abelesąbaso da, teda agai ma abelabo sunumi me elalubeo. Mu menio. Megi da te be te abelali bidi aga be elalueibao, te aga wąį nǫų nosali pedalubo hanigo be pedelaibao. Tama agai te nai dabe wei ma mabo kibu bede ma abelainu ebo usu me egobeo.

³¹Tiali goli, te obo elalusąbo madi elalubo dwasianu be dabe, te dagego homugo augwali te nai bulabo tǫ tiwai da homu yao. Tialima, te be dabe aga ayago ma abelabo usu yaibao, te nai dabe wei ma mabo kibu bede, te abelali bidi dabego te be aga ayabolo wei ponobaso usu dao.

³²Tialima, te Livai hani da, augwaligo te bomai po wali pelamuo. Te augwa taun obo tomode elalubo be yai baso da, teda augwaligo ma abelemainao,” te po wai.