Pris Sę Ebo Bomai Po 21:10-23

¹⁰“Hetprisgo aga sęde te nogi yai namba sali, te augwaligo aga toboluba wel gelebo sogo, te augwaligo aga te pris sę emainogo sa muai. Tama aga deli hani bage me deli isibaso, te homu dene ebo kolesaga wali pabo sogo, agai tobolu nisi olo elalumainogo igio, aga tobolu yaga bugagia sao. Te agai aga ugwa me pisągio.

¹¹Hetpris te isali bidi munalubo beba me pigio. Tiyu, aga eno gedude meda pedelabuo. Te aga aya ida isibaso, tagalao, agai aga digi te homu dene ebo sogo te meda iligio.

¹²Tama aga te eno Ugwa Be tagalama, te bidi tigi munalubo beba pelamuo. Agai tama sę eyu da, agai eno sel Ugwa Be meda pedalubo sę ilaibao. Dagego aga wel pilali, te eno dagebolo mani welgo te aga hetpris pedalumainu sa muai dao, tama tialima aga te isai bidi tigi munalubo beba pigio. Ena Genuai Bidigo eno te po wai dao.

¹³Hetprisgo te bidi dali me pisąwai we sobaso usu dao.

¹⁴Agai te we, bidi me isiyu taga pai we me sigio, ma we aga bidigo sela sąwai we sigio. Agai te sunumide penani sę ela bilai we, ma we, gasa bidigo penani yai we me sigio. Te tama we dabe augwalide habu sali. Agai te bidi dali me pagela pisąwai we sao, tama agai we te pris augwa hanide naga sao,” te po wai dao.

¹⁵“Te agai eno te po wali pisąbaso da, teda agai wai dabe eno gedude meda pedelaibao. Ena Genuai Bidi, eno aga ena da olama, sa muani, tama eno aga te hetpris sęba muai dao,” wali.

¹⁶Genuai Bidigo Mosesbolo ma wali,

¹⁷“Nago Aronba te tiwai po wao, te bidi me deli nago hanide pedalubaso, ma nosali te aga tigi dwasianu dolai baso, te bidigo enabolo mabo nai ofa me elamo dao.

¹⁸Tigidali bidi augwali tigi dwasianu dolai baso, augwaligo enaba ofa me elamuo. Eno te tiwai tobage pris bidi dabede po obao, te gedu widai bidi dabe, ma sągą dwai bidi, ma gesabidi dwai bidi, ma te idago aga ame nani sogo te nogo sągą pęwadage elama gagea paibaso,

¹⁹ma bidi sągą ma nogo dolali,

²⁰ma bidi tudi sugąsi bidi, ma pęwadage bidi mu yai baso, ma gedu dwai bidi, ma tigi dolali bidi yai baso, ma bidi aga domo dolai bidi, te tama tiwai bidi dabego pris sę eyu, enaba ofa nai me magio.

²¹Awe, te nago hanide bidai bidi me deli, te aga tigi dwasianu dolai elalubaso, agai te we bidigo mabo te tobage ofa dabe enaba me elamuo. Te habu mu dao.

²²Tialima, dagego enaba te ofa ebo kibu me gasa nai ofa ebo dabe te agai tumainao. Eno dage prisbolo menama tumainogo ebo ofa nai dabe te agai me sela tumainao.

²³Tiali goli, aga te Tedali Gasagi Yai Mu Be Habu genuai ugwa munalubo be habu pąba me pigio, aga te alta pageba me pelamuo. Tiyu, te wiegi yai nai dabe agai eno gedude meda ilidalio. Magi baso meni, ena digi ena Genuai Bidi, tama eno te nai dabe dąį eyu, sa muani, ena sę digi emainogo yali.” Genuai Bidigo te tama po wai dao.