Pris Sę Ebo Bomai Po 19:1-11

¹Genuai Bidigo Mosesbolo te po walama,

²te Israel we bidibolo te tiwai po omainogo yali, “Dage wiegi yai mu tedali mu bidiyu, te eno godolo yabo wiegi yai doloba pai kolesaga wali pao. Magi baso meni, ena God, dagego Genuai Bidi, ena tedali wiegi yai mu elalu, eno kolesaga wiegi yai doloba pai mu elalubo dao.

³Dage deli deligo duga ida aya dologode bidu, te augwaligo po wali pao. Dagego te olo toma nabo sogo, te Sabat side, sę me igio, dage olo toma naga tuyu, bidao. Ena Genuai Bidi, ena duga God, eno te po wai dao,” wali.

⁴“Dagego te tibo godiba lotu weyu, ena me tagaligio. Te dagego olo dali te olo nai aingo te lotu wabo tibo god nigilama, teba lotu me wagio. Te habu mu dao. Ena Genuai Bidi, ena dagego God, eno te po wai dao.”

⁵“Te dagego ena dali deli haliga pedelabo ofa ebo sogo, dagego eno dagebolo mani bomai po wali pelama, te ofa yao. Dagego te tama ebaso da, teda eno dagego ofa ebo godolo yaibao.

⁶Dagego te ofa yali kibu mi te kibu elali side ma te nosali side tuiyąo. Te kibu mi munalubadi te sela sogo wabo siba sabalobaso da, teda dagego te isiba ulama, te keli naga elalumainao.

⁷Te bidi me deligo te sela wabo side elaluali kibu mi tubaso da, teda te kolesaga eno gedude dwalio, tama eno te ebo ofa godolo homu me egobeo,” wali.

⁸“Mena bidigo te sela wali sogoba usu nani munaluali kibu mi tuali bidi da, te ena mani nai digi agai dwai ilibao, te aga yali sę dagede sęgę elalubao. Tama tialima, eno we bidi hanide aga sela sąwaibao,” wali.

⁹“Te dagego duga gide nai inawai tau yai togobo sogo, dagego te gi sesege homu badu elalubo nai togolama sigio. Te gi tomode nai dagego sabo sogo, te nai meba ela soabaso da, teda dage ma geasa peyu te nai ma sigio. Tede tama elalumainogo sula tagalao.

¹⁰Te dagego te wain tau inayani sela silibo sogo, dage te wain giba si sogo ma pelama, te hasia susiąma tagalali nedu du wain ma sigi pigio. Te tǫba tudulaluai munalubo wain du dagego me sigio. Dagego te nai dabe tagalama elalu, te magi nai meni yai bidi dabego, ma te gasa hani dage dali bidibo, te hani augwali somainao. Ena Genuai Bidi, ena duga Godigo, eno te tiwai po obao,” wai dao.

¹¹“Dagego gasa bidigo nai dabe wi me sigio, te dagego gasa bidiba tibo po wagio, te agai nai anoma elama sainogo tigio. Te dagego gasa bidiba tibo po ola magio.