Pris Sę Ebo Bomai Po 14:6-27

⁶Te prisgo gasa ba me ni sida dage, te mama yai hobi string me, ni hisop me, te selama, te kaneme yai ąįba munama, te ugwaba polo ma sao.

⁷Tama elama, agai te kaneme dwasianu te nogo a naga olama, te me badu nogo si wagi soabode te eno gedude dwagi yai pedelabo bidi tigiba sąsągą bilao. Tama prisgo agabolo te tiwai po walao, ‘Megi da nage God gedude wiegi yai pedelalio.’ Tama prisgo te bidibo ba selama, te buluba solama, te aga bola pomainogo yaibao.

⁸Te bidi aga wiegi yai pedelainogo eyu da, te aga ugwa ąį tedelama, te tobolu nisi togolama, te aga tigi me te aga ąį pauwao. Agai tama tibaso da, teda aga eno gedude wiegi yai pedelaibao. Tama aga te bidibo pesageba pagameo, tiali goli aga ugwa bede bulu, badu bidibadi a naga me si sogo usu nama te usu dao.

⁹Te nogo a naga si wabo side te aga tobolu nisi me penani nisi tigidali ma togwao, te gedu nisi me, te aga tigide gasa tigi nisi elalubo tigidali mu poayao. Te aga ugwa me ąį telayu, te aga me ąį pauwao, teda aga eno gedude wiegi yai magi meda meni yai pedelaibao,” wali.

¹⁰“Te 8 wabo side agai te sipsip omai wai si selama, te sipsip kibu so me deli kibu be deli yai sobadi yao. Augwali te dwai keni kenigo me dolisąwai wiegi yai mu sao. Tama agai te plaua sęgę kilogram sela yali wiegi yai sao, agai te oliv wel dali taluali, te wit ofa ulubo ofa tiwai eyu, te oliv kap wel si me sao,” wali.

¹¹“Tama agai te kibu sipsip dabe te plaua nai me eno sel Ugwa Beba sela pao, te pris me deligo aga wiegi yai pedalumainogo tau saibao. Tialima, prisgo te bidi te aga ofa yabo nai dabe dali te ena Genuai Bidi eno sel Ugwa Be sunumiba selasa pao,” wai dao.

¹²“Megi da prisgo te sipsip sigo te me deli selama, agai te oliv wel dali te dwai są yali isilibo ofa tiwai yao. Hasia bolo agai te nai dabe nogogo tulama, te eno gedude hogayu, iba eda yao,” po wai.

¹³“Tama nosali prisgo te sipsip wai te pesagede elao, augwaligo te sęgę sela sąyu, te bulmakau dabe elama, ofa ebo pesage, te isigo tigidali dela silimainu ofa ebo digi dao. Prisgo tama tiao, magi baso meni, te dwai sę silimainu ebo ofa tiwai te sęgę sela sąbo ofa tiwai ebao. Te ena dolo mu ebo sę ena God, eno te sipsip mi te pris dabebolo mawai dao.

¹⁴Nosali prisgo te sipsipgo kaneme dwasianu selama, te meda sela sąnama, wiegi yai pedelainu ebo bidigo dolo nogo olo badu muao, te dolo nogo a danide me mubadi, te bidigo dolo sągą a danide me muao,” wali.

¹⁵“Tama prisgo te oliv wel dwasianu selama, te aga pobase nogoba gelama, te wel nogo diąyao.

¹⁶Tama agai dolo nogo dani me deli te welba munama, te wel a naga si sogo sąsągą bilibaso da, te ena Genuai Bidi, eno aga sueibao.

¹⁷Nosali prisgo te aga nogode elaluali dwasianu wel selama, te wiegi yai pedalumainu ebo bidigo dolo nogo badu oloba muao, te genuai a nogo danide elalubo kanemeba me muyu, te bidigo a sągą danide elalubo me mubadi yao.

¹⁸Te wel me badu prisgo nogode elalubo agai te bidi toboluba muao. Te tebo kolesagade agai te bidi eno gedude wiegi yai pedalubo sę ilibo dao,” wali.

¹⁹“Te silama da, teda prisgo te sęgę sela sąbo ofa ebaso da, te bidi eno gedude wiegi yai mu pedelaibao. Te nosali agai te isigo tigidali mu dela silibo ofa yao,” te po wai dao.

²⁰“Tama agai te ofa ebo kibu dali te wit ulubo ofa dali te altade yao. Te kolesagade prisgo te bidi sęgę sela sąbo ofa ebao, tama te bidi eno gedude meda meniama, wiegi yai mu pedelai dao,” te po wai dao.

²¹“Te bidi magi nai mu meniama, te aga wiegi yai pedelabo ofa yabo nai dabe abelabo mone meni baso da, teda agai te omai sipsip wai deli naga sesao. Te kibu sipsipgo te aga dwai sę yali silimainu yaibao. Te nosali prisgo nogogo tolaluyu, te iba eda eno gedude tama tiao. Tama te bidigo te kilogram deli yai wiegi yai plaua somainao, tama te oliv wel dali taluama te wit ulubo ofa yao. Te agai oliv wel kap si sesemainao,” wali.

²²“Tama agai augwaligo te nogi hi wabo tobage ba si sesao, te ofa yabo, magi baso meni, agai te sipsip hauwa abelabo usu ebeo. Te ba hi me deligo te dwai sęgę sela sąyu, te me deligo te isiba ulama tigidali dela silibo ofa yaibao,” te po wai dao.

²³“Te augwaligo aga te wiegi yai pedalumainu sę ebo side, te 8 wabo side, agai te kibu doado bage te prisba sela peyu, te Genuai Bidi eno sel Ugwa Be sunumiba selasa asobaso da, teda eno sueibao,” wali.

²⁴“Tialima, prisgo te sipsip me oliv wel saibao, te nogogo tulama, te eno gedude iba eda yao.

²⁵Tama prisgo te sipsip wai elama, te dwai sę yali silimainogo ofa yaibao. Agai te ofa ebo nai kaneme dwasianu selama, te wiegi yai pedelainu ebo bidigo dolo nogo olo badu pilao, te agai dolo nogo a danide me pilibadi, te bidigo dolo sągą a danide me pilao,” wai dao.

²⁶“Te prisgo oliv wel dwasianu selama, te aga pobase nogode gealuama, te wel nogo tuwao.

²⁷Te agai dolo nogo dani te welba munama, te wel nogo a naga si sogo sąsągą pobaso da, te ena Genuai Bidi, eno sueibao.