Pisalem 84:2-7

²Au gu hiihai huoloo bolo au gi i golo! Au gu hidihidi bolo au e noho i lodo di Hale o Dimaadua. Dogu huaidina hagatau e daahili tenetene ang gi di God mouli.

³Nia hagabuulinga manu lligi hogi guu hai nadau waehongo, ge guu hai nadau hale i golo. Digaula e benebene nadau dama i baahi au gowaa hai tigidaumaha, meenei Yihowah Koia e Aamua, go dogu king mo dogu God.

⁴E tenetene huoloo go digau ala e noho i lodo doo Hale, e dadaahili hagahagaamu Goe i nia madagoaa huogodoo.

⁵E tenetene huoloo go digau ala ne wanga ginai oo mahi, ala e hiihai huoloo e hula gi di Gonduu Zion.

⁶I di nadau madagoaa e lloo adu laa lodo di gowaa maangoo baba i Baca, gei di maa guu hai di gowaa e hali ai nia monowai. Gei nia uwa o di madagoaa ga uwauwa guu nngolo huoloo gu haga honu di gowaa deelaa.

⁷Digaula gu tomo aga gei gu maaloo mai i di nadau lloo adu, gei digaula ga gidee di God o nia god i hongo Zion.