Pisalem 83:5-14

⁵Digaula guu baba gi di nadau hai dela ne haganoho guu buni ngaadahi bolo ginaadou e hai baahi adu gi di Goe.

⁶Digau aanei la go digau Edom mo digau Ishmael, digau Moab mo digau Hagri,

⁷digau Gebal, Ammon, mo Amalek, mo digau Philistia mo Tyre.

⁸Assyria guu buni gi digaula labelaa, tenua maaloo dela e hagamaamaa digau Ammon mo digau Moab, ala go nia hagadili o Lot.

⁹Heia gi digaula be dau hai dela ne hai ang gi digau Midian, mo ang gi Sisera mo Jabin i taalinga di Monowai Kishon.

¹⁰Goe gu haga magedaa digaula i Endor, gei nia huaidina digaula guu pala i hongo di gelegele.

¹¹Heia ang gi nia dagi digaula be dau hai dela ne hai ang gi Oreb mo Zeeb. Goe haga magedaa ina nia dagi digaula huogodoo be dau hai dela ne hai ang gi Zebah mo Zalmunna,

¹²ala ne hai boloo, “Gidaua gaa kae tenua o God deelaa e hai tau henua.”

¹³Meenei God, mmaga ina digaula gadoo be nia gelegele, be nia geinga laagau ala ma ga ili go di madangi gi daha.

¹⁴Hagabagia digaula gi daha gi dau madangi gono, gadoo be di ahi ma gaa dudu nia laagau i lodo henua. Haga madagudagu ina digaula gi dau madangi maaloo, gadoo be di ulaula ma gaa dudu nia gonduu gii wele.