Pisalem 78:3-26

³nia mee ala gu longo ai gidaadou ge gu iloo ai, nia mee ala gu hagi mai go tadau maadua mmaadua mai gi gidaadou.

⁴Gidaadou hagalee haga mmuni nia maa i tadau dama. Gidaadou e hagi anga nia maa gi nia adu daangada ala ga lloomoi i golo, i di hai o nia mogobuna o Dimaadua mo nia mee llauehe a Mee ala ne hai, mo nia hagadilinga mogobuna haga goboina ala ne hai go Mee.

⁵Mee guu wanga ana haganoho gi digau Israel mono haganoho ang gi di hagadili ni Jacob. Mee gu hagamodongoohia gi tadau damana ala namua bolo gi aago ina ana haganoho gi nadau dama,

⁶bolo gi iloo ai nia adu daangada ala e loomoi maalia, gei digaula ga aago labelaa nia maa gi nadau dama.

⁷Maa gaa hai beenei gei digaula ga hagadagadagagee labelaa gi God, ga hagalee de langahia nia mee a Mee ala ne hai, gei digaula ga haga gila aga nia haganoho a Maa i nia madagoaa huogodoo.

⁸Digaula ga hagalee hai be nadau maadua mmaadua, ala gu hai baahi gei gu de hagalongo, gei nadau hagadagadagagee gi God la gu hagalee maaloo, gei gu hagalee manawa dahi gi Mee.

⁹Digau Ephraim, e kae nadau maalei mono amu maalei, guu hula guu llele gi daha i di laangi dela ne hai tauwa.

¹⁰Digaula hagalee haga kila aga nadau hagababa ala ne hai ang gi God. Digaula hagalee hiihai bolo ginaadou e daudali nia haganoho a Maa.

¹¹Digaula gu de langahia e ginaadou nia mee a Maa ala ne hai, nia mogobuna ala nogo mmada ginai digaula nogo hai go Mee.

¹²Di madagoaa nadau maadua mmaadua nogo mmada ginai, God nogo hai ana mogobuna i di gowaa mehanga gonduu o Zoan i tenua go Egypt.

¹³Mee ne wwae di tai gaa lahi digaula laa lodo di maa. Mee ne hai nia wai gii tuu gi nua gadoo be nia abaaba.

¹⁴I di aa, gei Mee e lahi digaula i lala di gololangi, i di boo, gei Mee e lahi digaula i lala di maahina o di ahi.

¹⁵Mee ne haahi di hadugalaa i lodo di anggowaa, gaa wanga nia wai gi digaula mai i lodo di maa.

¹⁶Mee ne hai nia wai gi malingi mai gi daha mo di hadugalaa, gaa hai nia wai gii mmidi be di monowai damana.

¹⁷Gei digaula gi mua hua i lodo nadau hai huaidu e hai baahi gi God, gei digaula nogo hai baahi gi di Gowaa Aamua i lodo di anggowaa.

¹⁸Digaula nogo hagamada a God gi nadau hiihai e madamadau nadau meegai ala e hiihai ginai.

¹⁹Digaula e helekai hai baahi gi God boloo, “God e mee di gaamai gi gidaadou nia meegai i lodo di anggowaa deenei?

²⁰Ma e donu bolo Mee gu hagamaawa dana hadugalaa, gei nia wai gu malingi mai i di hadugalaa. Malaa, Mee e mee di gaamai hogi gi gidaadou nia palaawaa mo di wanga gi ana daangada nia goneiga?”

²¹Malaa, Dimaadua gu hagawelewele ne hagalongo gi nia helekai digaula, gei Mee gu daaligi ana daangada gi di ahi, gei di hagawelewele o Maa gi digaula la gi nonua mai,

²²idimaa digaula hagalee hagadagadagagee gi Mee, ge hagalee hagadonu bolo ma go Mee dela e haga dagaloaha digaula.

²³Gei Mee ga helekai gi lala di langi i nua bolo nia bontai di langi la gi maahuge.

²⁴Mee gaa wanga gi digaula nia huwa palaawaa mai i di langi, mai i dana goweia nia ‘manna’ gi digaula gi geina.

²⁵Malaa, digaula gu miami nia meegai o digau di langi, gei God guu wanga gi digaula nia mee huogodoo ala e hiihai ginai digaula.

²⁶Mee guu hai labelaa di madangi gii gono mai dua, gu haga ngalungalua di madangi gii gono mai i bahi i ngaaga gi ono mogobuna,