Pisalem 78:26-64

²⁶Mee guu hai labelaa di madangi gii gono mai dua, gu haga ngalungalua di madangi gii gono mai i bahi i ngaaga gi ono mogobuna,

²⁷gu hagau mai ana manu mamaangi e logowaahee gadoo be nia gelegele o tongotai gi ana daangada.

²⁸Nia manu la gu monnono gi lodo di waahale mo i di gili nia hale laa.

²⁹Malaa, nia daangada gu miami gu maaluu. God guu wanga gi digaula nia mee digaula ala e hiihai ginai.

³⁰Di madagoaa hua digaula digi mene i nadau mee ala e hiihai ginai, e miami hua igolo,

³¹gei God gu hagawelewele gi digaula, gu daaligi gii mmade nia daane digaula ala e koia e maaloo, go nia dama daane humalia o Israel.

³²Ma e aha maa Mee guu hai nia mee aanei, gei nia daangada e hai hua igolo di huaidu. Ma e aha maa digaula guu mmada gi nia mogobuna a Mee ala ne hai, gei digaula hagalee hagadagadagagee gi Mee.

³³Malaa, Mee guu hai nia mouli digaula gi hagalee, gadoo be di madangi ma gaa dogi go tangada, mo nia mouli digaula gi mada limalima.

³⁴Di madagoaa hua o Mee dela ne daaligi hunu gau i digaula gii mmade, gei digau ala ne dubu igolo gaa huli ang gi Mee, digaula gu maaliu nadau lodo gu dalodalo hagamahi gi Mee.

³⁵Digaula gu langahia bolo God la go di nadau abaaba, gu langahia bolo di Gowaa Aamua dela ne hagamaamaa ginaadou.

³⁶Gei nia helekai huogodoo digaula le e tilikai hua, di mee digaula ma ga helekai ai la hagalee donu.

³⁷Digaula hagalee manawa dahi gi Mee, ge hagalee manawa dahi gi di nadau hagababa dela ne hai gi mee.

³⁸Malaa, God la gu dumaalia huoloo gi ana daangada. Mee gu dumaalia gi nia huaidu digaula, digi daaligidia digaula gii mmade. Nia holongo e logo gei Mee e hagakono hua dono hagawelewele gi dee gila aga.

³⁹Idimaa Mee e langahia e Ia bolo digaula la nia daangada hua dangada, e hai gadoo be di madangi dela e angiangi ga hagalee.

⁴⁰E logowaahee behee go nia hai baahi o digaula gi Mee i lodo di anggowaa! Nia holongo e hia digaula ne hai a Mee gi manawa gee!

⁴¹Nia madagoaa e logo digaula e hagammada a God, e haga manawa gee di God Dabuaahia o Israel.

⁴²Digaula gu de langahia e ginaadou ana mogobuna aamua, mo di laangi dela ne haga dagaloaha ginaadou go Mee gi daha mo nadau hagadaumee,

⁴³gei nogo hai ana hegau hagagoboina mono mogobuna i lodo di gowaa mehanga gonduu o Zoan i tenua go Egypt.

⁴⁴Mee guu huli nia monowai gii hai nia dodo, gei digau Egypt gu deai nadau wai e inu ai.

⁴⁵Mee gu hagau mai ana lamu belee haga mmaemmae digaula, mono kailuu belee haga huaidu tenua.

⁴⁶Mee gu hagau mai nia ‘locust’ belee gai nia huwa laagau digaula, gei e haga huaidu nia gowaa digaula.

⁴⁷Mee gu daaligi gii mmade nia laagau waini mo nia laagau ‘fig’ gi di uwa hadu magalillili.

⁴⁸Mee gu daaligi nia kau digaula gii mmade gi di uwa hadu magalillili, mo nia hagabuulinga manu digaula gi di ila.

⁴⁹Mee guu hai digaula gii tale gi di haingadaa, mai dono daaligi digaula gi dono hagawelewele, e hai gadoo be tangada kae hegau ne hanimoi belee daaligi nia daangada gii mmade.

⁵⁰Mee digi dugua dono hagawelewele, be e dugu hua digaula haga mouli, gei Mee gu daaligi digaula gi taumagi.

⁵¹Mee gu daaligi nia ulu mmaadua dama daane huogodoo o nia madahaanau huogodoo o digau Egypt gii mmade.

⁵²Nomuli, gei Mee gu laha mai ana dama gadoo be tangada hagaloohi siibi, gaa dagi digaula laa lodo di anggowaa.

⁵³Mee guu dagi digaula hagahumalia, gei digaula gu hagalee mmaadagu. Gei di moana guu gahu nia hagadaumee digaula.

⁵⁴Mee gu laha mai digaula gi dono henua haga madagu, gi di gonduu dela ne kumi ko Ia.

⁵⁵Mee gu hagabagi gi daha digau o nia guongo aalaa i di madagoaa o ana daangada ala nogo hula. Mee guu duwwe nia gowaa digau o tenua deelaa la i nia madawaawa Israel, gaa wanga nia guongo digaula gi ana daangada.

⁵⁶Gei digaula gu hai baahi gi God di Gowaa Aamua, ga hagamada a mee. Digaula digi daudali nia helekai a maa,

⁵⁷gei digaula e hai baahi, gei e de hagalongo gadoo be nadau maadua mmaadua, gu hagalee kana ginai gadoo be di amu maalei biga.

⁵⁸Digaula guu hai a Mee gi hagawelewele gi nadau gowaa hai daumaha o digau bouli, ngaadahi mo nadau balu god.

⁵⁹God gu hagawelewele huoloo dono mmada gi di hai deenei, gaa hidi iei Mee guu kili gi daha ana daangada.

⁶⁰Mee gu diiagi dono lohongo dela i Shiloh, di gowaa a mee nogo noho ai i tadau baahi i mua.

⁶¹Mee guu dugu anga gi tadau hagadaumee gi kaina Tebedebe o di Hagababa, dela go di hagamodongoohia nia mogobuna o Maa mono madamada.

⁶²Mee gu hagawelewele gi ana daangada donu, guu hai digaula gi daaligidia go nadau hagadaumee gii mmade.

⁶³Nia dama daane gu daaligi guu mmade i lodo tauwa, nia dama ahina gu nadau daangada e lodo ginai ai.

⁶⁴Digau hai mee dabu guu mmade i taaligi, gei nia lodo digaula gu hagalee dumaalia ginai e hai nadau hangihangi.