Pisalem 77:10-16

¹⁰Malaa, gei au ga helekai, “Deenei di mee koia gu haga manawa gee au: Di Gowaa Aamua la gu deai ono mogobuna ai.”

¹¹Meenei Dimaadua, au ga langahia eau au mee ala ne hai. Au ga haawa eau au hagadilinga mee haga goboina ala ne hai i mua loo.

¹²Au e hagamamaanadu au mee huogodoo ala ne hai. Au e hagamamaanadu au hegau mogobuna huogodoo.

¹³Meenei God, au mee huogodoo ala e hai le e dabu. Ma di god i golo e aamua be Goe ai.

¹⁴Ma kooe hua go di God dela e hai au mogobuna, Goe gu hagamodongoohia aga o mogobuna ang gi nia daangada.

¹⁵Goe ne haga dagaloaha au daangada gi o mogobuna, ala go di hagadili ni Jacob mo Joseph.

¹⁶Meenei God, di madagoaa nia wai ne mmada adu gi di Goe, nia maa gu mmaadagu, di moana gu bolebole.