Pisalem 71:1-20

¹Meenei Dimaadua, au e hanadu gi di Goe e abaaba Kooe. Goe hudee heia au gi magedaa!

²Idimaa Goe dela e donu, hagamaamaa ina au, haga dagaloaha ina au. Hagalongo mai, daawa ina au gi daha mo di haingadaa!

³Goe gii hai di hadugalaa bala hagammuni mau dangihi ni oogu, mo di gowaa abaaba mau dangihi dela e abaaba au. Goe go dogu gowaa e bala ginai au mo dogu haga dagaloaha.

⁴Meenei dogu God, haga dagaloaha mai au gi daha mo digau huaidu, mo nia mogobuna o digau huaidu ge hagamuamua.

⁵Meenei dogu Dagi go Yihowah, ma Kooe hua dela e hagadagadagagee ginai au. Ma Kooe hua dela nogo kana ginai au mai loo i dogu damagiigi.

⁶Au nogo kana adu hua gi di Goe mai i lodo dogu mouli hagatau. Goe nogo abaaba au mai loo dogu laangi ne haanau ai. Au ga hagaamu Goe i nia madagoaa huogodoo!

⁷Dogu mouli la guu hai di ada mee hagamodongoohia e daudali go digau dogologo, idimaa Goe go dogu Dangada Daa maaloo.

⁸Au e haga hagaamu Goe mai loo luada gaa dae loo gi di boo, mo di hagadele di hai o madamada.

⁹Goe hudee diagina au dela gu madumadua. Goe hudee hudua au gi daha dolomeenei dela gu bagege beenei.

¹⁰Ogu hagadaumee e hiihai bolo ginaadou e daaligi au gii made, digaula e helehelekai i nadau mehanga e haganohonoho di nadau hai dela belee hai baahi mai gi di au.

¹¹Digaula e helekai, “God gu diiagi a mee. Gidaadou gaa hula i muli o mee e kumi a mee, ma hagalee tangada e haga dagaloaha a mee ai.”

¹²Meenei God, hudee haga mogowaa ina Goe gi daha mo au. Meenei God, hagamaamaa ina au dolomeenei!

¹³Digau ala e hiihai bolo ginaadou e heebagi mai gi di au, la gi hagamagedaa ina gi daaligidia. Digau ala e hagamada e haga mmaemmae au, la gi langaadia gi haadanga balua.

¹⁴Nia madagoaa huogodoo gei au ga hagadagadagagee adu gi di Goe, au ga haga hagaamu Goe gi nonua loo.

¹⁵Au ga hagadeledele di hai o do humalia, au ga helehelekai i di hai o dau hagamouli, mai luada gaa dae loo gi di boo, ma e aha maa au e dee dohu di modongoohia di maa.

¹⁶Au ga hana i lodo nia mahi o dogu Dagi go Yihowah. Au ga hagadele di hai o do humalia, go do humalia la hua.

¹⁷Goe gu aago au mai dogu madagoaa nogo damagiigi, gei au e hagadele hua igolo di hai o au hegau haga goboina.

¹⁸Dolomeenei gei au gu madumadua mo dogu libogo gu hinaa, meenei God, Goe hudee diiagia au! Goe gi madalia au i dogu madagoaa dela e hagadele di hai o mogobuna mo oo mahi ang gi nia adu daangada huogodoo ala ma ga lloomoi.

¹⁹Meenei God, oo donu le e dau i nua loo. Goe guu hai au hegau hagalabagau huoloo, ma deai tangada e hai be Goe ai.

²⁰Goe gu gaamai gi di au di haingadaa mo di dadaaligi, gei Goe gaa hai labelaa au gi maaloo. Goe ga benebene au gi dee made.