Pisalem 68:15-30

¹⁵E aamua huoloo behee go di Gonduu Bashan, di gonduu e logo ono ulu gonduu!

¹⁶Goodou go nia ulu gonduu haga madagu le e aha ala e mmada iha haga balumee gi hongo di gonduu a God dela ne hilihili belee noho ai? Dimaadua la gaa noho i golo gaa hana hua beelaa!

¹⁷Di Tagi ga hanimoi i Sinai gi lodo di gowaa haga madagu mo ana waga dauwa hongo henua e logowaahee.

¹⁸Mee gaa hana gi nua gi nia gowaa nnoo nua, e lahi ana gau galabudi dogologo madalia Ia, gei Mee e kumi ana wanga dehuia mai digau ala e hai baahi. Yihowah God gaa noho i golo.

¹⁹Hagaamu ina di Tagi, dela e aamo tadau hagadaamaha i nia laangi huogodoo. Mee go di God dela e haga dagaloaha gidaadou.

²⁰Tadau God la di God dela e haga mouli gidaadou. Mee go Yihowah, go tadau Dagi, dela e daa mai gidaadou gi daha mo di made.

²¹Ma e donu bolo God ga haga mamaawa nia libogo o ono hagadaumee gi momooho hagalligi, go digau ala e manawa hamaaloo i lodo nadau haihai huaidu.

²²Di Tagi gu helekai, “Au ga laha mai labelaa gi muli o hagadaumee i Bashan, Au ga laha mai labelaa digaula mai tua di moana,

²³gii mee goe di haele i lodo nia dodo digaula, gii mee labelaa au paana di tobotobo nadau mee ala e hiihai ginai.”

²⁴Meenei God, do haele aali la guu mmada ginai digau huogodoo, di hula dagi a God, go dogu king, gi lodo dono lohongo haga madagu.

²⁵Digau ala e huwa nadau daahili le e hula i mua, digau ala e hai nadau gatangi e hula i muli, mugi lodo la go nia dama ahina ala e haga tangitangi nadau ‘tambourine’.

²⁶“Goodou hagaamu ina a God i lodo nia dagabuli o ana daangada. Hagaamu ina Dimaadua, goodou huogodoo go di hagadili ni Jacob!”

²⁷Matagidagi go Benjamin di madawaawa mulibee, ga nomuli go nia dagi o Judah mo nadau hagabuulinga daangada, ga nomuli go nia dagi Zebulun mo Naphtali.

²⁸Meenei God, hagamodongoohia ina aga o mogobuna, nia mogobuna ala nogo hai Kooe i madau baahi,

²⁹mai i do Hale Daumaha i Jerusalem, i di gowaa dela e gaamai ginai nia wanga dehuia o nia king gi di Goe.

³⁰Wou gi Egypt, go di manu llamu dauwa dela i lodo nia aalek. Wou gi nia henua, ala go nia hagabuulinga kau daane mo nadau dama, gaa dae loo gi digaula huogodoo gaa pala gi lala mo di gowadu dehuia gi di Goe nadau silber. Heia digau ala e hiihai bolo ginaadou e hai nadau dauwa gi lellele dagidahi!