Pisalem 60:4-7

⁴Goe gu haga iloo gi digau ala e hagalaamua Goe, bolo gii mee di llele digaula gi daha mo taaligi.

⁵Haga dagaloaha ina gimaadou gi oo mahi. Helekai mai gi madau dalodalo, gei au daangada ala e aloho ai gaa mee di dagaloaha.

⁶God gu helekai mai i hongo dono lohongo haga madagu boloo, “Idimaa dela Au gu aali, Au ga hahaahi Shechem, gaa duwwe di gowaa mehanga gonduu o Sukkoth gi agu daangada.

⁷Gilead la ni aagu, mo Manasseh labelaa. Ephraim la go dagu goobai dauwa, gei Judah la go dagu dogodogo king.