Pisalem 48:1-8

¹Dimaadua le e aamua huoloo gei e humalia belee hagaamu giibeni a Mee i lodo di waahale tadau God, i hongo dana gonduu haga madagu.

²Zion, di gonduu a God, le e duuduu i nua ge e humalia. Di waahale o di King Aamua le e haga tenetene henuailala hagatau.

³God gu hagamodongoohia bolo ma di gowaa noho baba i di aumaalia la i dono baahi i lodo di abaaba o di waahale deenei.

⁴Nia king gu dagabuli mai belee heebagi gi di Gonduu Zion.

⁵Di madagoaa hua digaula ne mmada gi di maa, digaula gu goboina. Digaula gu mmaadagu guu llele gi daha.

⁶Digaula gu mmaadagu huoloo gu uli nadau gai, e hai gadoo be di ahina ma ga hoohoo ga haanau,

⁷e hai gadoo be nia wagabaalii ma ga huduhudu go nia beau i lodo di madangi gono.

⁸Gimaadou gu longono nia mee a God ala ne hai, gei dolomeenei gimaadou guu mmada gi di maa i lodo di waahale o di madau God, go Yihowah di Gowaa Aamua. Mee ga benebene di waahale deenei ga hana hua dono hagaodi ai.