Pisalem 40:2-13

²Mee ne hudi aga au gi daha mo di bongoo hagalliga dangada, gi daha mo di gelegele waiwai llala. Mee ne dugu au gi hongo di hadugalaa, guu hai au gii duu hagahumalia.

³Mee ne aago mai gi di au dana daahili hoou, taahili e hagaamu ai tadau God. Digau dogologo ala gaa mmada gi di mee deenei, ga mmaadagu ga hagadagadagagee gi Dimaadua.

⁴E maluagina go tangada dela e hagadagadagagee gi Dimaadua, mee hagalee huli gi nia balu god, ge hagalee madalia digau ala e daumaha gi nia balu god tilikai.

⁵Meenei Dimaadua, go di madau God, Goe guu hai au mee haga goboina e logowaahee huoloo mai gi gimaadou! Ma deai tangada e hai be Goe ai! Goe guu hai au haganoho e logowaahee gei e humalia huoloo mai gi gimaadou! Au e deemee di hai bolo e helekai nia maa huogodoo, di hulu nia maa e logowaahee e deemee di dau!

⁶Goe hagalee hiihai gi nia tigidaumaha mono wanga dehuia, gei Goe e de hei e Goe nia manu ala e dudu hagadogomaalia i hongo di gowaa dudu tigidaumaha, be go nia tigidaumaha ala e wwede nia huaidu. Gei deeai, Goe ne gaamai ogu dalinga aanei belee hagalongo iei au adu gi di Goe.

⁷Malaa, gei au ga helekai, “Deenei au, dau hai dela e aago au la i lodo di beebaa haganoho.

⁸Meenei dogu God, au e hiihai huoloo e hai do manawa! Au e dadaahi au agoago i lodo dogu manawa.”

⁹Meenei Dimaadua, i lodo nia madagoaa ala e dagadagabuli ai au daangada huogodoo, gei au e hagadele di longo humalia o dau hai dela ne hagamouli gimaadou. Goe e iloo hua bolo au hagalee loo e noho di hagihagi anga au helekai.

¹⁰Au hagalee hagammuni i ogu lodo di longo humalia hagamouli deelaa. Nia madagoaa huogodoo, gei au gu hagadele do manawa dahi mo dau hagamaamaa. Au gu hagalee noho deemuu i lodo au daangada ala ma ga dagabuli, gei au gu helehelekai aga i di hai o do manawa dahi mo do aloho dee modu.

¹¹Meenei Dimaadua, au e iloo bolo Goe hagalee dugu do dumaalia huoloo mai gi di au. Do aloho mo do manawa dahi ga benebene laa au i nia madagoaa huogodoo.

¹²Nia huaidu e logowaahee e haganiga mai i dogu gili, e logowaahee e deemee di dau! Ogu huaidu guu kumi au, gei au gu deemee di mmada gi daha, ma koia e logowaahee i nia ngaahulu o dogu libogo, ogu lodo gu manawa bagege.

¹³Meenei Dimaadua, haga dagaloaha ina au! Hagamaamaa ina mai au dolomeenei!