Pisalem 37:6-21

⁶Mee gaa hai au hegau donu gi dingidingia gadoo be di laa.

⁷Manawa hagakono mo di talitali maalia di mee a Dimaadua dela gaa hai. Goe hudee de nnoomaalia gi digau ala guu noho humalia i nadau haihai ala ma gaa hai, be go digau ala e kila humalia nadau hagataele huaidu.

⁸Hudee de nnoomaalia be e hagawelewele. Goe gaa hai beelaa, gei goe gaa tale gi di haingadaa.

⁹Digau ala e gana gi Dimaadua ga hai mee gi tenua deelaa, gei digau ala e hai nia mee huaidu la ga hagabagi gi daha.

¹⁰Hoohoo mai hua, gei digau hai mee huaidu ga hagalee. Goe ga halahala digaula, gei goe hagalee gidee digaula.

¹¹Gei ogo digau ala e manawa hila gi lala, la aalaa digau ga hai mee gi tenua deelaa, gaa noho maluagina mo di tenetene gei e noho i di aumaalia.

¹²Digau huaidu le e haganoho di nadau hai dela bolo e hai baahi gi digau ala e humalia, ge e daumada digaula hagadugina.

¹³Malaa, di Tagi e gadagada gi digau ala e hai mee huaidu, idimaa, Mee e iloo Ia bolo digaula gu hoohoo hua ga hagalee.

¹⁴Digau ala e hai nia mee huaidu e haga mmuu aga nadau hulumanu dauwa, mo di hagatogomaalia nadau maalei belee daaligi digau hagaloale mo digau ala e noho huaidu ang gi ginaadou, e daaligi gii mmade digau ala e hai nadau mee donu.

¹⁵Malaa, digaula gaa bida daaligi hua gi nadau hulumanu dauwa donu, gei nia maalei digaula ga hadihadi.

¹⁶Nia mee dulii ala e hai mee ginai tangada humalia, la koia e dahidamee i nia maluagina o digau hai mee huaidu dogologo,

¹⁷idimaa, Dimaadua la ga daa gi daha nia maaloo o digau ala e hai nia mee huaidu, ga hagaloohi digau ala e humalia.

¹⁸Dimaadua le e madamada humalia hua i digau ala e hagalongo ang gi de Ia. Gei ogo digaula ga hai mee gi tenua deelaa, gaa hana hua beelaa.

¹⁹I lodo di madagoaa haingadaa, gei digaula hagalee e huaidu ang gi ginaadou. I lodo di madagoaa tau magamaga, gei digaula e logo hua nadau meegai.

²⁰Gei ogo digau ala e hai nia mee huaidu la gaa mmade, nia hagadaumee a Dimaadua la ga hagalee gadoo be nia akai ala i lodo henua. Digaula ga hagalee gadoo be nia huiahi.

²¹Digau huaidu le e kae nadau mee boibana, hagalee hui, gei digau humalia e dumaalia i nadau wanga dehuia.